Biada zdaryłasia ŭ vioscy Chołmieč u Rečyckim rajonie. Tut pamior niemałady mužčyna, a na nastupny dzień znajšli miortvym jaho syna-milicyjanta.
Ivanu Jafimčyku było 36 hadoŭ. Jon byŭ rodam ź vioski Chołmieč, ale słužyŭ u Rečycy, u słužbie achovy.
«Ivan byŭ narmalny chłopiec, univiersitet skončyŭ, — kažuć pra jaho miascovyja žychary. — Pracavaŭ spakojna, časam dziažuryŭ u rajvykankamie na vachcie. Kab mocna piŭ ci štości takoje — nichto nie čuŭ».
Jafimčyk niaredka pryjazdžaŭ da baćkoŭ, kali mieŭ vychodnyja, dapamahaŭ z haspadarkaj. Tym bolš što apošnim časam jaho baćka i maci niaredka žyli paasobku — siastra Ivana naradziła dvajniatak, tamu maci časta jeździła da dački, kab dapamahčy ź dziećmi. Baćka Ivana, Anatol, zastaŭsia sam u domie. Anatolu Jafimčyku było ŭžo za 70 hadoŭ, jon mieŭ surjoznyja prablemy sa zdaroŭjem.
22 kastryčnika Anatol Jafimčyk pamior.
Telehram-kanał Niechta paviedamiŭ, što nibyta Ivan źbiŭ spačatku svajho baćku, paśla niejkaha jašče susieda. Ale ŭ vioscy heta kateharyčna abviarhajuć. Kažuć, što nie było bojki ani z baćkam, ani z susiedam.
«Baćka pamior, bo daŭno chvareŭ. Jon vypivaŭ vielmi mocna ŭ svoj čas. Plus dyjabiet, cisk, prablemy z sercam… Jon sa žniŭnia nie vychodziŭ z chaty. Užo ŭsie čakali, što pamre…
Ale jaho žonka dahladała i muža, i ŭnukaŭ. Navat kali zastavałasia ŭ dački, to znachodziła čas niekalki razoŭ na dzień zajści da muža», — kažuć susiedzi.
Paśla na pachavańnie baćki pryjechaŭ i Ivan.
«Ranicaj pryjšli ludzi na pachavańnie i raptam kryk: znajšli Vańku! Akazałasia, što jon ździejśniŭ samahubstva na łuzie niepadaloku. Čamu? A voś hetaha nichto nie viedaje», — kažuć viaskoŭcy.
Niekatoryja z susiedziaŭ kažuć, što śmierć baćki mahła stać apošniaj kroplaj.
«Ad Ivana žonka syšła. Zabrała dačku, pajšła zamuž za inšaha. Daŭno ŭžo heta było, ale jon vielmi mocna pieražyvaŭ. Vielmi dobry chłopiec byŭ, vielmi. Moža, nie vynies usiaho hetaha, zaraz moładź takaja…» — kaža inšaja z susiedak.
Anatola Jafimčyka pachavali 23 kastryčnika. Na nastupny dzień raźvitalisia i ź jaho synam Ivanam. Abodvuch pachavali na viaskovych mohiłkach u Chołmiečy.
