Pryrodnyja skarby samaj poŭnačy Biełarusi — terra incognita dla bolšaści našych suajčyńnikaŭ. Da Rasonaŭ ci Vierchniadźvinska ź Minska treba dabiracca daŭžej, čym da tych ža Brasłaŭskich azior. Ź Viciebska tudy taksama jechać nie zusim zručna, a dla žycharoŭ Paleśsia vandroŭka na poŭnač uvohule moža zaniać ceły dzień. Tym nie mienš, u hetym hłuchim i zusim nieraskručanym kutku raźmieščana niekalki vielmi cikavych pryrodnych terytoryj, i padobnyja da ich vy naŭrad ci sustreniecie ŭ inšych miescach Biełarusi.
Adno z takich unikalnych miescaŭ — zakaźnik Sińša, što raźmiaściŭsia na miažy Rasonskaha rajona i Pskoŭskaj vobłaści Rasii. Tut raźmieščana bieźlič azior, biaskrajnija lasy (samaje lasistaje miesca biełaruskaha Paazierja) i niezvyčajnyja pahorki (naprykład, 20 pahorkaŭ na adnym kvadratnym kiłamietry!). Na adnajmiennym voziery Sińša možna adšukać, napeŭna, samy vuzki i doŭhi paŭvostraŭ u Biełarusi — cełych try kiłamietry abapał vašaj ściežki budzie aziornaja vada.
Samy pryhožy čas dla hetych miaścin, kaniešnie, vosień, kali šmatlikija kamary i ślapni ŭžo źnikajuć, a lasy afarboŭvajucca ŭ załatyja kolery. Asabliva kali heta siaredzina kastryčnika, jaki apošnija hady raduje biełarusaŭ niezvyčajnaj ciepłynioj.
