16 kastryčnika ministr zamiežnych spraŭ Biełarusi Uładzimir Makiej daŭ vialikaje intervju žurnalistam piaci niedziaržaŭnych ŚMI, u tym liku «Našaj Nivy». Pieršyja pytańni žurnalistaŭ datyčyli temy hetak zvanaj «Sajuznaj dziaržavy Biełarusi i Rasii» i prapanoŭ Maskvy ab «pahłyblenaj intehracyi».
«Nijakaha palityčnaha składnika ŭ prahramie intehracyi niama, havorka pra bolš pahłyblenuju intehracyju ŭ śfierach, jakija majuć značeńnie tolki dla ekanamičnaha raźvićcia dziaržavy: harmanizacyja praviłaŭ i uzhodnienaja pramysłovaja, enierhietyčnaja (asabliva nam cikavy adziny rynak enierhanośbitaŭ), ahrarnaja palityka, abmien infarmacyjaj ab ruchu tavaraŭ», — skazaŭ Uładzimir Makiej.
«Na pieršapačatkovym etapie abmierkavańnia byli nieprymalnyja dla nas prapanovy, — pryznaŭ biełaruski ministr. — Ja tak razumieju, heta rabotniki siaredniaha źviana rasijskich ministerstvaŭ unieśli ich. Ab stvareńni niejkich nadnacyjanalnych struktur, naprykład. Ale prezidenty na forumie ŭ Piecierburhu pryznali niemetazhodnaść raboty nad prapanovami, jakija ŭtrymlivajuć palityčny składnik: niama sensu havaryć, naprykład, ab stvareńni centralnaha banka, kali my ekanamična nie intehravalisia», — adznačyŭ Makiej.
«Razhladajecca, dzie b zakanadaŭstva było nabližana, i ja nie dumaju, što źjaviacca niejkija novyja orhany — isnuje mnostva instytucyjanalnych miechanizmaŭ, jakija dazvalajuć narmalna ŭzajemadziejničać, pytańni mohuć razhladacca na sumiesnych kalehijach ministerstvaŭ», — skazaŭ jon.
Makiej ličyć niemetazhodnaj publikacyju napracovak novych biełaruska-rasijskich dakumientaŭ.
«Davajcie pačakajem da pačatku śniežnia, — prapanavaŭ Makiej. — Ja navat nie ŭpeŭnieny, što našy ministerstvy zmohuć padrychtavać i realizavać usie tyja płany, jakija adlustravany ŭ prajekcie prahramy pahłyblenaj intehracyi».
«Nie skazaŭ by, što ludzi tak užo chvalujucca ab dakumientach bolš pahłyblenaj intehracyi z Rasijaj. Ja taksama sustrakajusia ź ludźmi i baču, što hałoŭnaje, što ich chvaluje, heta kab była praca, dobry zarobak i hetak dalej. Peŭnyja koły ŭ Biełarusi, kaniečnie, chvaluje hetaje pytańnie, — praciahnuŭ svaju dumku jon. — Niekalki tysiač čałaviek stvarajuć hlebu dla manipulacyj ci insinuacyj».
Makiej padkreśliŭ, što nie bačyć niebiaśpiek dla Biełarusi: «Nie isnuje i dumki ab tym, kab chtości padumaŭ ab stracie niezaležnaści ci suvierenitetu».
«[Alaksandr Łukašenka] adnaznačna skazaŭ, što heta niemahčyma — u nas hramadstva inšaje, čym jano było 20 hadoŭ tamu. Užo niekalki pakaleńniaŭ naradziłasia ŭ novaj dziaržavie, jany nie bačać siabie ŭ inšaj dziaržavie, a ŭ niezaležnaj Biełarusi», — skazaŭ Makiej.
U toj ža čas ministr padkreśliŭ, što Biełaruś budzie trymacca isnujučych adnosin z Rasijaj: «Isnujuć mižnarodnyja pahadnieńni, jakija my abaviazalisia vykonvać».
«Nakolki mnie viadoma, ciapier usie apytańni, jakija pravodziacca, kažuć pra toje, što vialikaja kolkaść hramadzian jašče vykazvajecca za ščylnyja adnosiny z Rasijaj, — adznačyŭ Makiej, — ale pavialičvajecca i kolkaść hramadzian, jakija chočuć adnosin i Rasijaj i ź inšym bokam — ź ES».
Hałoŭnyja pahrozy dla Biełarusi Makiej bačyć u ekanomicy i militaryzacyi našaha rehijona ŭ vyniku rostu napružańnia ŭ adnosinach Rasii i NATA.
