Prezident Ukrainy Uładzimir Zialenski padčas svajho vizitu ŭ ZŠA sustrakaŭsia z Semam Kiślinym, jakoha ŚMI źviazvajuć z ukrainskaj i rasijskaj arhanizavanaj złačynnaściu, paviedamlaje The Insider i «Schiemi».
Jak paviedamlaje vydańnie, u sieradu, 25 vieraśnia, padčas aficyjnaha vizitu Zialenskaha ŭ ZŠA, u rajonie haścinicy Parkier prajšli dźvie sustrečy: adna aficyjnaja — niepasredna ŭ haścinicy, druhaja — u susiednim budynku, u restaranie Ruskaja čajnaja.
U pieršaj udzielničaŭ sam Zialenski i jašče niekalki dziasiatkaŭ čałaviek, a druhaja, nieaficyjnaja, prajšła ŭ bolš vuzkim kole. Zialenskaha na joj pradstaŭlaŭ kiraŭnik Ofisa prezidenta Andrej Bohdan.
Pavodle vydańnia, Kiślin prysutničaŭ u miescy praviadzieńnia pieršaj sustrečy, a taksama byŭ arhanizataram i ŭdzielnikam druhoj.
Na fota bačna, jak Zialenski vychodzić z haścinicy Parkier razam z udzielnikami sustrečy. Dźvie krynicy paćvierdzili, što čałaviek u čyrvonaj kamizelcy, tvar jakoha na fota nie trapiŭ, mienavita Kiślin.
Pieršaja sustreča stała adnosna publičnaj. U joj brali ŭdzieł viadomyja pradstaŭniki jaŭrejskaj dyjaspary ZŠA.
Druhaja sustreča prachodziła ŭžo ŭ vuzkim kole. Udzielnikaŭ paprasili nie rabić fatahrafij.
Krynica adznačyła, što «heta była prosta sustreča pa biznesie, pa inviestycyjach z ZŠA va Ukrainu i, naadvarot, inviestycyjach ukraincaŭ u nieruchomaść u ZŠA.
«Sem Kiślin zvodziŭ ludziej, kazaŭ, tabie treba pahavaryć z tym, a tabie z tym, maje prapanovy varta nakiroŭvać tamu čałavieku», — skazała krynica.
Uradženca Adesy Sema (Siamiona) Kiślina FBR źviazvaje ź niabožčykam Ivańkovym (Japončykam) z Sołncaŭskaj hrupoŭki i bratami Michaiłam i Lvom Čornymi (Izmajłaŭskaja hrupoŭka).
Akramia taho, Kiślin viadomy jak paplečnik i donar eks-mera Ńju-Jorka Rudzi Džulijani, jaki ciapier źjaŭlajecca daradcam Donalda Trampa.
