Hrodzieniec Stanisłaŭ Cybinski 5 kastryčnika apynuŭsia ŭ niezvyčajnaj situacyi. U centry Hrodna jon ratavaŭ kurycu, jakaja vybiahała na darohu i mahła stvaryć avaryjnuju situacyju. Na dapamohu mužčyna vyklikaŭ supracoŭnikaŭ DAI i MNS. Apieracyja pa vyratavańni ptuški zaniała kala dźviuch hadzin, piša hrodna.life
Sa słoŭ Stanisłava, kuryca ciapier znachodzicca ŭ Punkcie časovaha ŭtrymańnia bieznahladnych žyvioł. Ale kab jaje tudy zabrali, Stanisłavu pryjšłosia vyzvońvać šmatlikija haradskija słužby.
«Tak, situacyja niezvyčajnaja, ale chtości pavinien byŭ heta zrabić, — raspaviadaje Stanisłaŭ. — Spačatku kuryca špacyravała pa Mastavoj, a paśla stała vybiahać na darohu. Ja sprabavaŭ jaje złavić, biehaŭ za joj i adhaniaŭ pad most. Ale ptuška ŭsio roŭna vybiahała. Tady ja vyrašyŭ patelefanavać u MNS i milicyju. Apošnija nakiravali mianie ŭ DAI. Nichto nie chacieŭ reahavać na maje zvanki. Prosta śmiajalisia. Tolki na piaty zvanok pryjechali supracoŭniki. Jany skazali, što heta nie ich sprava, ale dapamahli vyzvanić słužbu pa adłovie žyvioł».
Mužčyna kaža, što navat «łaŭcy» z SAHa nie žadali spačatku łavić kurycu, spasyłajučysia na inšuju śpiecyfiku.
«Kazali, što zajmajucca katami i sabakami. A ptuškami chto zojmiecca? Heta ž čyjaści ŭłasnaść, tym bolš stvaraje prablemu na darozie. U vyniku bolš za dźvie hadziny svajho času mnie pryjšłosia vydatkavać, kab haradskija słužby źviarnuli ŭvahu na prablemu. U vyniku «łaŭcy» zabrali kurycu ŭ Punkt časovaha ŭtrymańnia bieznahladnych žyvioł. Paabiacali, što źviažucca ź miascovym učastkovym, jaki budzie šukać uładalnikaŭ ptuški. Ahulnymi namahańniami my vyratavali kurycu i zaścierahli kiroŭcaŭ na darozie. Spadziajusia, chutka abjavicca haspadar», — dadaŭ Stanisłaŭ.
