Prezident Ukrainy Uładzimir Zialenski zvolniŭ z pasady sakratara Rady nacyjanalnaj biaśpieki i abarony Alaksandra Daniluka. Adpaviedny ŭkaz apublikavany na aficyjnym sajcie prezidenta Ukrainy.
Ukaz byŭ padpisany i apublikavany 30 vieraśnia. Pra toje, chto budzie pryznačany na pasadu kiraŭnika RNBA zamiest Daniluka, pakul nie paviedamlajecca. Aficyjnych kamientaroŭ pa hetaj situacyi z boku ofisa prezidenta abo eks-sakratara RNBA pakul taksama nie pastupała.
Mahčymaje zvalnieńnie Daniluka abmiarkoŭvajecca z 27 vieraśnia. U hety dzień ŚMI paviedamili, što kiraŭnik RNBA napisaŭ adpaviednuju zajavu, jakuju Zialenski paabiacaŭ razhledzieć paśla viartańnia z ZŠA. Paźniej stała viadoma, što Daniluk padaŭ u adstaŭku z-za roznahałośsiaŭ z kiraŭnikom ofisa prezidenta krainy Andrejem Bohdanam i aliharcham Iharam Kałamojskim. Daniluka nie zadavalniała, što Bohdan sprabavaŭ upłyvać na rašeńnie RNBA, a Kałamojski chacieŭ pavialičyć svoj upłyŭ na ŭkrainskuju palityku i atrymać kampiensacyju za nacyjanalizacyju «Pryvatbank».
Daniluk byŭ pryznačany na pasadu sakratara RNBA na nastupny dzień paśla inaŭhuracyi Zialenskaha, 22 maja.
