U kancy lipienia Donald Tramp havaryŭ pa telefonie z prezidentam Ukrainy Uładzimiram Zialenskim. Abstaviny hetaj razmovy nastolki ŭstryvožyli supracoŭnika adnoj z amierykanskich śpiecsłužbaŭ, što stali pradmietam unutranaha rasśledavańnia.
Kanhres patrabuje padrabiaznaściaŭ, ale administracyja Trampa pakul što admaŭlajecca ich davać. Šmat što ŭ hetaj historyi zasakrečana, a bolšaja častka infarmacyi paviedamlajecca amierykanskimi ŚMI sa spasyłkaj na ananimnyja krynicy.
Pra isnavańnie skarhi tydzień tamu paviedamiŭ kanhresmien-demakrat Adam Šyf, staršynia kamiteta pa raźviedcy ŭ Pałacie pradstaŭnikoŭ ZŠA.
U skarzie havorycca pra patencyjnuju «surjoznuju abo aburalnuju prablemu, złoŭžyvańnie abo parušeńnie zakona».
Mienavita ŭ telefonnaj razmovie ź Zialenskim amierykanski prezident moh skazać niešta lišniaje, paviedamiła pozna ŭviečary ŭ čaćvier hazieta Washington Post sa spasyłkaj na 2 daśviedčanyja krynicy.
Zvanok Trampa Zialenskamu ŭžo staŭ pradmietam inšaha razboru. Demakraty ŭ Pałacie pradstaŭnikoŭ padazrajuć prezidenta i jaho advakata Rudzi Džulijani ŭ sprobach vykarystać ukrainskija ŭłady va ŭnutrypalityčnych metach.
Uradavyja krynicy amierykanskich ŚMI paviedamlali, što administracyja zaciahvaje davańnie pakieta vajennaj dapamohi Ukrainie.
Amierykanski prezident nazvaŭ paviedamleńni «čarhovymi fejkavymi navinami». Prezident napisaŭ u tvitary, što jon viedaje, što jaho razmovy z suśvietnymi lidarami mohuć słuchać supracoŭniki amierykanskich i zamiežnych śpiecsłužbaŭ, i tamu jon nie kaža ničoha lišniaha padčas takich «hustanasielenych» zvankoŭ.
U ofisie prezidenta Ukrainy nie chočuć kamientavać razmovu z Trampam, paviedamlaje karespandent Bi-bi-si ŭ Kijevie Džona Fišer.