Paŭtara hoda «chimii» i pazbaŭleńnie pravoŭ — taki vyrak vynies Bahracijonaŭski rajonny sud Kalininhradskaj vobłaści Rasii byłomu administrataru staličnaha fitnes-centra «Nardzin» Viačasłavu Karniejaŭcu. Jaho pryznali vinavatym u «pjanym» DTZ, jakoje jon ździejśniŭ dva hady tamu na vulicy Kalvaryjskaj u Minsku. Paśla zdareńnia kiroŭca źbieh i byŭ abvieščany ŭ vyšuk. Taksist, u čyju mašynu ŭrezałasia BMW abvinavačanaha, atrymaŭ ciažkija traŭmy, piša Tut.by.
Kala hadziny nočy 29-hadovy kiroŭca BMW 650i xDrive na Kalvaryjskaj nie spraviŭsia z kiravańniem i ŭrezaŭsia ŭ słup, zatym aŭto adkinuła ŭ spadarožnaje taksi Opel Astra. Kiroŭca taksi atrymaŭ ciažkija traŭmy. Paśla DTZ kiroŭca BMW pasprabavaŭ źbiehčy, ale byŭ znojdzieny, a zatym adpuščany inśpiektaram DAI.
Jak potym stała viadoma, za rulom znachodziŭsia Viačasłaŭ Karniejaviec, uradženiec Homielskaj vobłaści i hramadzianin Rasii. U Minsku jon pracavaŭ administrataram centra «Nardzin».
U momant DTZ chłopiec byŭ pjany — 0,94 pramile ałkaholu. Praź niekalki dzion SK raspačaŭ u dačynieńni da jaho kryminalnuju spravu pa č. 4 art. 317 (Parušeńnie PDR asobaj, jakaja kiravała transpartnym srodkam u stanie ałkaholnaha apjanieńnia, što paciahnuła pa nieaściarožnaści pryčynieńnie ciažkaha cialesnaha paškodžańnia) i č. 3 art. 159 (Śviadomaje pakidańnie ŭ niebiaśpiecy) KK Biełarusi. Aŭtamabilist da hetaha času ŭžo źjechaŭ z krainy i byŭ abjaŭleny ŭ vyšuk.
Kryminalnaja sprava ab DTZ trapiła ŭ sud Bahracijonaŭska 30 maja. Pad vartu abvinavačanaha nie brali, na pasiedžańni jon prychodziŭ sa svaim abaroncam - kalininhradskim advakatam Haškaram Junusavym. Bok paciarpiełaha pradstaŭlała maci taksista Dzianisa, Taćciana Ivanaŭna.
Na minułym tydni Viačasłavu Karniejaŭcu vynieśli prysud: jon pryznany vinavatym pa č. 2 art. 264 KK Rasii (u redakcyi ad 31.12.2014 hety kodeks dziejničaŭ na momant ździajśnieńnia DTZ, ciapier za hetaje złačynstva praduhledžana bolš žorstkaje pakarańnie). Jamu pryznačana pakarańnie ŭ vyhladzie pazbaŭleńnia voli terminam paŭtara hoda, z adbyvańniem pakarańnia ŭ papraŭčaj kałonii va ŭmovach pasialeńnia. Taksama Karniejaviec budzie pazbaŭleny vadzicielskich pravoŭ na try hady.
- Pry vyniasieńni prysudu sud ŭličyŭ źmiakčalnyja akaličnaści: pryznańnie abvinavačanym viny, raskajańnie ŭ zroblenym, taksama jon zahładziŭ vinu pierad paciarpiełym - raśpiska ab hetym ad taksista ŭ spravie jość, - paviedamili Tut.by u Bahracijonaŭskim rajonnym sudzie.
