Biełaruskaje hramadstva abmiarkoŭvaje publikacyju rasijskaha «Kamiersanta», jaki piesimistyčna apisaŭ budučyniu Biełarusi sa spasyłkaj na ŭłasnyja krynicy — pavodle nibyta atrymanaj prahramy ekanamičnaj intehracyi, naša ekanomika ŭ bližejšyja hady faktyčna stanie źlitaj z rasijskaj.
Pres-sakratarka Alaksandra Łukašenki ŭ adkaz abvinavaciła «Kamiersant» u «pustych žurnalisckich štampach».
Čytajcie: Natalla Ejsmant pra «kanfiederacyju»: My idziom na ekanamična metazhodnyja kroki. Ale niezaležnaść — śviatoje
A što pra heta dumajuć prafiesijanały?
«Naša Niva» paprasiła prakamientavać tezisy materyjała staršyniu Respublikanskaha kłuba finansavych dyrektaraŭ Andreja Karpunina. Jon taksama biare ŭdzieł u zakonatvorčaści — siabar rabočaj hrupy pa padrychtoŭcy prapanovaŭ ab kompleksnaj karekciroŭcy Padatkovaha kodeksa Biełarusi.
Karpunin aceńvaje infarmacyju «Kamiersanta» jak nierealistyčnuju.
Andrej Karpunin, fota belgazeta.by
«Praviadu anałohiju: voś u vas u rukach dźvie siemki — vonkava jany padobnyja, vy ich nie adroźnivajecie. Heta Padatkovyja kodeks i Hramadzianski kodeksy. Vy i vaš susied pasadzili ich 25 hod tamu. Nu pieršyja hady rostu jašče nie zrazumieła, što ź ich vyraście — my tady pačynali ź vielmi padobnych madelaŭ. Ale praz 25 hod zrazumieła, što ŭ kahości vyras kaštan, hruba kažučy, u kahości — dub. Našy sistemy padatkovaha i hramadzianskaha zakanadaŭstva raźvivalisia vielmi pa-roznamu.
I ciapier skryžavać dub z kaštanam i skazać, što heta dreva žyćciazdolnaje? Niešta fantastyčnaje.
My nie resursnaja kraina, miechanizmy napaŭnialnaści našych biudžetaŭ roznyja! Kodeksy ŭ asobnych raździełach adroźnivajucca na dobrych 40%. I praktyka, i staŭki, i lhoty ŭ nas adroźnivajucca vielmi mocna.
I mnie absalutna zrazumieła, što nivodnaja z krain nie hatovaja pierachodzić na kodeks inšaj. Našyja praktyki napracavanyja, jany zadavalniajuć patreby žyćcia ŭ nievialikaj krainie i vializnaj fiederacyi.
Ja mahu pavieryć, što možna skłaści niejki apisalny škilet nadnacyjanalnaha padatkovaha kodeksa, ale jon nie budzie ŭpłyvać na realnuju stratehiju. Ja baču, jak tut možna nałamać drovaŭ i naškodzić, ale jak stvaryć niešta takoje, kab jano prynosiła karyść — nie baču.
Možna hlanuć na dośvied Jeŭrasajuza jak najbolš prahmatyčny i dasiažny dla analiza: za minułyja 30 hod jany nie sprabavali złamać kožnuju nacyjanalnuju sistemu, ale majuć praktyku prymianieńnia nadnacyjanalnych dyrektyŭ. U hetych ramkach jany sprabavali znachodzić kampramisy miž usimi ŭdzielnikami: niejkija krainy vymušany byli pastrožyć nacyjanalnaje zakanadaŭstva, a niekatoryja, naadvarot, źmiakčyli jaho. Heta ŭ ich zaniała 30 hod!
Ale ŭ ich jość i Jeŭraparłamient, i Jeŭrakamisija. A kali my havorym pra nas, to ŭ nas jość JEAES, u ramkach jakoha častka hetych pracesaŭ i tak adbyvajecca. A tut što, źjaŭlajecca jašče adna halina, jakuju treba niejak ukručvać unutr isnujučaha ŭnutranaha zakanadaŭstva i zakanadaŭstva JEAES? Ja nie baču ni realnaj mahčymaści, ni patencyjała ŭ hetaha», — miarkuje Karpunin.
