Fota Vadzima Zamiroŭskaha, TUT.BY
Były vučań staŭbcoŭskaj škoły pryznany vinavatym u zabojstvie nastaŭnika i 11-kłaśnika, a taksama ŭ zamachu na zabojstva ŭ dačynieńni da jašče dvuch školnikaŭ. Prysud — 13 hadoŭ pazbaŭleńnia voli ŭ vychavaŭčaj kałonii. Z-za ŭzrostu abvinavačanaha sprava słuchałasia ŭ zakrytym režymie, publična abviaścili tolki prysud, piša Tut.by.
Trahiedyja adbyłasia 11 lutaha. Vučań 10 kłasa Vadzim Miłašeŭski pryjšoŭ na zaniatki zahadzia, kala 7.40. Pakinuŭ partfiel i vyjšaŭ z kabinieta. Zatym viarnuŭsia i z nažom napaŭ na nastaŭnicu historyi Marynu Parchimovič, jakaja pavinna była vieści pieršy ŭrok. Za piedahoha pasprabavali zastupicca dva adnakłaśniki, u vyniku jany atrymali ranieńni. Paśla hetaha abvinavačany vybieh z kłasa, zajšoŭ u susiedni kabiniet, dajšoŭ da apošniaj party i napaŭ na vučnia 11-ha kłasa Alaksandra Ramanava, chłopiec pamior na miescy. Vadzim źbieh, ale praź dźvie hadziny jaho zatrymali. U zaplečniku ŭ jaho znajšli małatok, a pry asabistym vobšuku — dymavyja šaški i pietardy. Tak chranałohiju tych padziej apisvaŭ Śledčy kamitet.
Pra zahinułuju nastaŭnicu jaje byłyja vučni vykazvalisia samymi ciopłymi słovami. Sašu Ramanava apisvali jak metanakiravanaha i pryjaznaha chłopca. Pra Vadzima kazali, što jon byŭ spakojnym i bieskanfliktnym, dobra vučyŭsia i nie mieŭ prablem z pavodzinami. Nichto nie moh pavieryć, što jon zdolny na takoje złačynstva. Tamu matyŭ — što ruchała padletkam — vyklikaŭ zakanamiernyja pytańni ŭ mnohich.
Vadzima Miłašeŭskaha pryznali vinavatym u zabojstvie dźviuch asobaŭ z asablivaj žorstkaściu z chulihanskich mierkavańniaŭ, zamachu na zabojstva dviuch asobaŭ z asablivaj žorstkaściu z chulihanskich mierkavańniaŭ i asabliva złosnym chulihanstvie. Viadoma, što prakuror prasiŭ dla Vadzima Miłašeŭskaha 13 hadoŭ pazbaŭleńnia voli — heta maksimalna mahčymy termin z ulikam taho, što na momant ździajśnieńnia złačynstva padletku było mienš za 16 hadoŭ.
Baćka zahinułaha Alaksandra Ramanava ŭ sudzie. Fota Vadzima Zamiroŭskaha, TUT.BY
Čytajcie: Baćka zabitaha ŭ Stoŭbcach školnika prakamientavaŭ prysud zabojcu syna
Zhodna z vynikami miedycynskaha ahladu, padletak nie znachodziŭsia ni ŭ stanie ałkaholnaha apjanieńnia, ni pad uździejańniem narkatyčnych i psichatropnych rečyvaŭ. Psichołaha-psichijatryčnaja ekśpiertyza pakazała, što Vadzim Miłašeŭski ŭ poŭnaj miery moh uśviedamlać značeńnie svaich dziejańniaŭ i kiravać imi. Svaju vinu abvinavačany pryznaŭ častkova.
Sudovaje pasiadžeńnie prachodziła ŭ zakrytym režymie, pakolki na momant ździajśnieńnia złačynstva školniku było mienš za 16 hadoŭ. Akramia taho, u materyjałach spravy ŭtrymlivajucca źviestki ab stanie jaho zdaroŭja — miedycynskaja tajamnica.
Adznačym, što rašeńnie suda pakul nie ŭstupiła ŭ zakonnuju siłu i moža być abskardžana ŭ Viarchoŭnym sudzie.