Alaksandr Łukašenka 19 žniŭnia pryznačyŭ Andreja Kunceviča namieśnikam staršyni Administracyi prezidenta. Jon budzie adkazvać za ideałohiju, a taksama ŚMI. «Naša Niva» ŭspaminaje asobaŭ, jaki zajmalisia ideałahičnaj rabotaj u Administracyi prezidenta.
Uładzimir Zamiatalin (1995—1997; 2000—2001): «Biełaruśfilm» i biełarusafob
Na prykładzie Zamiatalina možna lohka adsačyć, kim akružaŭ siabie Alaksandr Łukašenka ŭ pieršyja hady prezidenctva. Heta ŭradženiec rasijskaj Tuły, jaki skončyŭ Danieckaje vyšejšaje vajskova-palityčnaje vučylišča, paśla słužyŭ u vojsku palitrukom u Hiermanii, Dalokim Uschodzie. U vyniku los zanios Zamiatalina ŭ Biełaruś, dzie jon uznačaliŭ pres-słužbu Minabarony.
Zamiatalin byŭ u kamandzie Viačasłava Kiebiča na vybarach 1994 hoda. Mienavita jon prydumaŭ skarystać u jakaści «čornaha pijaru» toje, što Łukašenka skraŭ fien u ściuardesy, kali viartalisia z pajezdki ŭ Kitaj. Praŭda, vielmi chutka pierakinuŭsia ŭ kamandu pieramožcy vybaraŭ.
Paśla skandału z «biełymi plamami» ŭ hazietach u adstaŭku syšoŭ Alaksandr Fiaduta, i mienavita Zamiatalin staŭ načalnikam hałoŭnaha ŭpraŭleńnia hramadska-palityčnaj infarmacyi, a ŭ chutkim časie staŭ namieśnikam Administracyi prezidenta.
Zamiatalina vyłučała nierazumieńnie i nieluboŭ da ŭsiaho biełaruskaha. U jahony čas byŭ biesprecedenty cisk na ŭsio biełaruskaje. U 2018 hodzie Zamiatalin trapiŭ u skandał, kali kasirka «Jeŭraopta» źviartałasia da jaho pa-biełarusku, a były ideołah na heta kryčaŭ: «Nie chaču ja havaryć na vašaj dołbanaj movie».
U kancy svajoj čynoŭnickaj karjery Zamiatalin uznačalvaŭ «Biełaruśfilm». I tut varta adznačyć, što źniatyja pry im byli nie tolki filmy pra vajnu, ale patryjatyčnaja stužka «Masakra», a taksama antytatalitarnaje kino «Vaŭki».
Mabyć, na kaniec karjery paŭpłyvaŭ i syn ideołaha. U 2015 hodzie za ekanamičnyja złačynstvy da šaści hadoŭ źniavoleńnia byŭ prysudžany syn Zamiatalina Dzianis.
Uładzimir Zamiatalin pamior letam 2019 hoda. Raźvitańnie ź im prachodziła biez asablivaj pašany.
Ivan Paškievič (1997 — 2000): baptyzm i emihracyja ŭ ZŠA
Hety ŭradženiec Stolinskaha rajona byŭ siarod tych, chto dapamahaŭ Alaksandru Łukašenku pravieści kanstytucyjnyja refierendumy ŭ 1995—1996 hadach. Za heta jon i atrymaŭ vysokuju pasadu ŭ Administracyi prezidenta.
U 2000 hodzie Paškievič abirajecca (na spravie pryznačajecca) deputatam Pałaty pradstaŭnikoŭ. U parłamiencie Paškievič niečakana dałučajecca da hrupy «Respublika» (jaje ŭznačalvali Frałoŭ, Parfianovič i Skrabiec), aściarožna pačynaje krytykavać ułady.
Ivan Paškievič — pratestancki viernik. Mabyć, mienavita heta i paŭpłyvała na jahony vybar.
Jak daradca staršyni Sajuza jevanhielskich chryścijan-baptystaŭ Paškievič z adkrytym listom źviartaŭsia da Łukašenki. «Łukašenka raspačaŭ nieprychavanuju vajnu suprać pratestanckaj carkvy ŭ Biełarusi. Aryšty prapaviednikaŭ i pastyraŭ, niepamiernyja štrafy ŭ dačynieńni da carkoŭnych słužkaŭ, zakryćcio malitoŭnych damoŭ, admova rehistravać novyja cerkvy — voś nabor vajskovych srodkaŭ «pravasłaŭnaha ateista» ŭ dačynieńni da jevanhielskich chryścijanaŭ», — pisaŭ Paškievič.
U 2006 hodzie Ivan Paškievič emihravaŭ u ZŠA. Žyvie ŭ Fiładelfii (štat Piensilvanija), redahuje ruskamoŭnuju hazietu «Novaje słova», a taksama viadzie na radyjo pieradaču pra palityku. U intervju raskazvaje, što maryć viarnucca na radzimu.
Stanisłaŭ Kniazieŭ (2001—2003): kontrraźviedčyk i rektar
Jašče adzin ideołah, jaki absalutna nie mieŭ nijakich santymientaŭ da biełaruskaści. Kniazieŭ naradziŭsia ŭ 1948 hodzie ŭ Novasibirsku. Pracavaŭ ślesaram na «Sibsielmašy», a potym pastupiŭ u Vyšejšuju škołu KDB imia Dziaržynskaha.
Amal usio svajo žyćcio Kniazieŭ adpracavaŭ u vojsku. Piać hadoŭ byŭ u HDR, dva hady ŭ Afhanistanie, udzielničaŭ u likvidacyi nastupstvaŭ Čarnobylskaj katastrofy. U pieršaj pałovie 1990-ch uznačalvaŭ vajskovuju kontrvyviedku KDB. U 1997 hodzie pierajšoŭ na pracu ŭ Instytut nacyjanalnaj biaśpieki, jaki ŭ chutkim časie ŭznačaliŭ. Mienš za hod pabyŭ namieśnikam dziaržsakratara Rady biaśpieki.
Paśla vybaraŭ 2001 hoda pryznačany namieśnikam pa ideałohii ŭ Administracyju prezidenta. Kniazieva nazyvali čałaviekam Urała Łatypava, ź jakim jany pierasiakalisia jašče na minskich kursach Vyšejšaj škoły KDB. Zrešty, užo praz dva hady naśpieła patreba ŭ bolš maładym i hnutkim ideołahu.
U 2003 hodzie Kniazieŭ staŭ rektaram Akademii kiravańnia pry prezidencie, na hetaj pasadzie prabyŭ da 2007 hoda. Paśla hetaha Kniazieŭ pracavaŭ u niekalkich navučalnych ustanovach. Ad 2011 da 2018 byŭ rektaram MITSO. Ciapier źjaŭlajecca staršynioj navukovaj rady ŭniviersiteta.
Aleh Pralaskoŭski (2003—2006): ministr infarmacyi i Sierhijeŭ Pasad
Troje z čatyroch pieršych ideołahaŭ Administracyi prezidenta naradziłasia za miežami našaj krainy i pachodzili z asiarodździa siłavikoŭ. Pralaskoŭski pryjšoŭ na śviet u haradku Sierhijeŭ Pasad pad Maskvoj. Vučyŭsia ŭ Minsku na zienitčyka. Prachodziŭ słužbu ŭ HDR.
Vykładaŭ u Vyšejšym inžyniernym zienitna-rakietnym vučyliščy i Vajskovaj akademii. U internecie zachavaŭsia vypusk pieradačy «5 zorak» 1994 hoda, dzie małady major Pralaskoŭski navat sprabuje razmaŭlać pa-biełarusku.
Z vykładańnia jaho pieraviali na ideałahičny front. Pralaskoŭski ŭznačalvaŭ analityčny adździeł Słužby biaśpieki prezidenta, a taksama infarmacyjnaje ahienctva BiełTA. Na čas pracy Aleha Vitoldaviča ŭ Administracyi prezidenta pryjšłasia Płošča-2006 z «pacukami, pornačasopisami i narkotykami».
U 2009 hodzie Pralaskoŭski ŭznačaliŭ Ministerstva infarmacyi. Mienavita pry im niedziaržaŭnyja ŚMI atrymlivali rekordnuju kolkaść papiaredžańniaŭ. U 2011 hodzie «Naša Niva» i «Narodnaja vola» byli na miažy zakryćcia.
Paśla adstaŭki z pasady ministra źjechaŭ na radzimu, u Rasiju, dzie žyvie pa siońnia. Čas ad času čytaje lekcyi ŭ Akademii kiravańnia pry prezidencie Rasii. Pa niepaćvierdžanaj infarmacyi, maje taki-siaki biznes.
Anatol Rubinaŭ (2006—2008): stalinist i paet
Fizik rodam z Mahilova. Ad 1960-ch Rubinaŭ pracavaŭ u Akademii navuk BSSR, doktar fizika-matematyčnych navuk. Ad 2002 da 2006 uznačalvaŭ Vyšejšuju atestacyjnuju kamisiju.
Hałoŭnym ideołaham krainy Rubinaŭ staŭ paśla vybaraŭ 2006 hoda. I adrazu hety čałaviek pačaŭ ździŭlać svaimi pohladami: jon adkryta zachaplaŭsia asobaj Iosifa Stalina, zaklikaŭ viarnucca da dziaržaŭnaj palityki ateizmu.
U svaich šmatlikich publikacyjach prafiesar śćviardžaŭ, što Biełaruś nikoli nie mieła svajoj ułasnaj dziaržaŭnaści, a pačałosia budaŭnictva svajoj ułasnaj dziaržavy tolki ŭ 1994 hodzie paśla abrańnia prezidentam Łukašenki. Bolš za toje, Rubinaŭ navat zaklikaŭ uvieści ŭ Biełarusi rasijski rubiel. Takaja voś ideałohija.
Aproč usiaho hetaha, Rubinaŭ byŭ jašče paetam, u vydaviectvie «Mastackaja litaratura» vyjšła jaho kniha «Vot ona, naša žizń». Adzin ź vieršaŭ staŭ ledź nie kłasičnym:
Och, narod ty naš, narod,
Och, narodiŝie!
Iz połtysiači porod —
Odna porodiŝa!
Naš odin — za ichnich dvuch —
Tolko daj borŝa…
I raz v dvadcať kriepčie duch…
Iz tualetiŝa.
Paśla adstaŭki z administracyi Rubinaŭ byŭ śpikieram Savieta respubliki. Ale byŭ vymušany syści paśla taho, jak spatrebiłasia terminova prydumać pasadu dla byłoha premjera Michaiła Miaśnikoviča. Ciapier viadzie žyćcio cichaha minskaha piensijaniera, jakoha tolki zredku bačać na prahułkach u parkach.
Natalla Piatkievič (2009—2010): try šluby i ZŠA
Tyja, chto ciapier naziraje za Natallaj Ejsmant, mahčyma, užo nie pamiataje, što ŭ Łukašenki ŭžo była maładaja ambicyjnaja pres-sakratarka. Piatkievič była pres-sakratarkaj kiraŭnika krainy ad 2001 da 2004 hoda. Paśla hetaha pajšła ŭ Administracyju prezidenta.
Natalla Piatkievič — minčučka, jana naradziłasia ŭ siamji hałoŭnaha doktara 7-j stamatałahičnaj palikliniki Uładzimira Kraŭčanki. Vučyłasia na jurydyčnym fakultecie BDU. Pieršym jaje mužam byŭ Uładzisłaŭ Piatkievič, jaki ŭznačalvaŭ «Nacyjanalnyja spartyŭnyja łatarei». Ad hetaha šlubu zastaŭsia syn Filip.
Ź Piatkievič źviazany šerah skandałaŭ. Jana publična svaryłasia z tahačasnym kiraŭnikom BT Alaksandram Zimoŭskim. Narešcie, heta joj prypisvali ideju razyhryvańnia antypolskaj karty pierad vybarami 2006 hoda. Jana nie bajałasia cynična vykazvacca na publiku, kali treba było apraŭdać admienu lhotaŭ.
Paśla pracy ŭ administracyi Piatkievič jašče doŭha była pamočnicaj prezidenta — heta pasada vyklučna blizkaja da kiraŭnika dziaržavy. Ź dziaržaŭnaj słužby jana syšła ŭ 2014 hodzie. U druhim šlubie Piatkievič była zamužam za namieśnikam staršyni BT Alaksandram Martynienkam, ale i jon nie praciahnuŭsia doŭha.
Ciapier Natalla Uładzimiraŭna zamužam za dypłamatam Valancinam Rybakovym, jaki źjaŭlajecca pradstaŭnikom Biełarusi pry AAN. Cikava, što Piatkievič pa-raniejšamu znachodzicca pad amierykanskimi sankcyjami, ale moža žyć u Ńju-Jorku pa linii AAN.
Alaksandr Radźkoŭ (2010—2014): rusifikatar sistemy adukacyi
Uradženiec Bychaŭskaha rajona. Radźkoŭ źjaŭlajecca vychadcam z Mahiloŭskaha dziaržaŭnaha ŭniviersiteta, alma-mater kiraŭnika krainy. Jon pracavaŭ tam spačatku na kafiedry ałhiebry i hieamietryi, a potym uvohule staŭ rektaram hetaj VNU.
U 2003 hodzie Alaksandr Radźkoŭ staŭ ministram adukacyi zamiest Piatra Bryhadzina, jaki doŭhi čas admaŭlaŭsia padpisvać ukaz ab zakryćci Humanitarnaha liceja imia Kołasa.
Čas ministerstva Radźkova možna acharaktarazavać jak imklivuju rusifikacyju. Mnohija škoły, jakija doŭhi čas byli biełaruskimi, pierachodzili na ruskuju movu. Radźkoŭ pieravioŭ vykładńnie historyi Biełarusi na ruskuju movu, heta nie mohuć adkrucić až pa siońnia. U niejkich santymientach da biełaruskaści Radźkova zapadozryć było vielmi składana.
Taksama Radźkoŭ ad momantu stvareńnia ŭznačalvaŭ «Biełuju Ruś», jakaja tak i nie stała palityčnaj partyjaj. Adnak niadaŭna i tut jon pieradaŭ svaje paŭnamoctvy Hienadziu Davydźku. Na siońnia Radźkoŭ zvyčajny piensijanier.
Ihar Buzoŭski (2014—2016): rajon Minska i knihadrukavańnie
Pachodzić z Navahrudka. Baćka byŭ supracoŭnikam KDB. Ihar atrymaŭ vajskovuju adukacyju, ale być siłavikom jamu było nie pa dušy. Praź niejki čas jon pajšoŭ pracavać psichołaham u škołu ŭ Navahrudku.
U pačatku 2000-ch Buzoŭski adkazvaŭ za suviazi z hramadskaściu na BT. Ad momantu stvareńnia — u BRSM. Mienavita z hetaj arhanizacyjaj źviazany zorny čas Buzoŭskaha. I tamu jamu naležyŭ šerah inicyjatyvaŭ. U 2010 hodzie Buzoŭski staŭ pieršym sakratarom BRSM.
U Administracyi prezidenta małady čynoŭnik siabie asabliva ničym nie prajaviŭ. Paśla jaho ŭvohule skasavali pasadu namieśnika pa ideałohii. Płanavałasia raździalić hetyja abaviazki miž pieršym namieśnikam Maksimam Ryžankovym i pres-sakratarkaj Natallaj Ejsmant.
Buzoŭski paśla niaŭdałaha dośviedu pracy ideołaham uznačalvaŭ Centralny rajon Minska. U pryncypie, heta pasada, ź jakoj možna znoŭ pajści na pavyšeńnie. Nie atrymałasia i na hety raz. Ciapier jon namieśnik ministra infarmacyi. Adkazvaje za nie samy pieradavy kirunak — knihadrukavańnie.
Uładzimir Žaŭniak (2018—2019): ničoha pra jaho nie viedali, ničoha i nie daviedalisia
Žaŭniak rodam z Chojnikaŭ Homielskaj vobłaści. Vajskoviec. Adukacyju atrymlivaŭ u Novasibirsku. Šmat hadoŭ addaŭ armii.
Tolki ŭ 2002 hodzie pierachodzić na pracu ŭ Nacyjanalny centr zakanadaŭstva i pravavych daśledavańniaŭ. Ad 2008 hoda ŭznačalvaŭ upraŭleńnie zakanadaŭstva ab nacyjanalnaj biaśpiecy. Ad 2014 — namieśnik centra. Nie skazać, kab pasada duža vysokaja, tamu mnohich dziviŭ taki karjerny ŭźlot.
Mahčyma, paraić jaho moh inšy namieśnik staršyni Administracyi prezidenta Valeryj Mickievič, jaki nieadnarazova sustrakaŭsia z Žaŭniakom na roznych pasiadžeńniach i kanfierencyjach.
Za hety hod Žaŭniak tak i nie staŭ publičnaj asobaj, jon nie zapomniŭsia ni słovami, ni dziejańniami. Pakul nieviadoma, čym jon budzie zajmacca dalej.
