U biełaruskich telehram-kanałach źjaviłasia infarmacyja, što ŭ chutkim časie Baranavicki avijaremontny zavod pačnie ramont bałharskich Su-25.
«Historyja tam była takaja: amierykancy prapanoŭvali bałharam admovicca ad Su-25 i pradać ich u Afryku, umoŭna. A ŭzamien kupić u ich A10 i F16. Ale bałhary praličyli plusy i minusy i padumali, što vyhadniej budzie adramantavać suški, — paviedamlaje kanał «Kulhavy djabał».
Cikavostka tut u tym, što Bałharyja — heta kraina NATA. Precedent absłuhoŭvańnia zachodnikaŭ u Biełarusi moh by adkryć vialiki rynak madernizacyi vajennaj techniki inšych krain ES.
Su-25, fota mil.by
Raniej užo chadzili čutki, što Baranavicki zavod moža ramantavać tyja samaloty — tolki jon adzin adhuknuŭsia na adpaviedny tendar bałharskich vajennych. Ale situacyja zatarmaziłasia praz toje, što struktury Aljansa ŭsio nijak nie sankcyjanavali absłuhoŭvańnie ŭ Biełarusi praz vajskovy sajuz z Rasijaj.
Dyk ci sapraŭdy ŭdałosia ŭrehulavać hetyja pytańni i zaklučyć damovu?
Kiraŭnictva Baranavickaha zavoda ŭ razmovie z «Našaj Nivaj» admoviłasia kamientavać adnosiny z bałharami: «Heta DSK [dla słužbovaha karystańnia], moža, vam raskažuć u Vajenpramie», — adkazaŭ hałoŭny inžynier.
U Dziaržvajenpramie taksama spasłalisia na kamiercyjnyja tajamnicy: «U takich situacyjach byvaje, što baki ŭ kantrakcie damaŭlajucca ab nierazhałošvańni niejkich abo ŭsich detalaŭ», — skazali ŭ pres-słužbie.
Šarahovyja rabotniki avijazavoda, zaniatyja na ramoncie techniki, na ŭmovach ananimnaści paviedamili, što bałharskija samaloty nieŭzabavie prybuduć u Baranavičy: «Rychtujemsia čynić».
