Pra pryznačany sud paviedamiła sama placoŭka «Zručny horad. Petitions.by» u sacsietkach.
Petitions.by — prajekt niekamiercyjnaj arhanizacyi sa składanaj nazvaj «Kansultacyjny centr implemientacyi infarmacyjnych technałohij u hramadzianskaj supolnaści «Sivik Tek».
Heta sajt, stvorany dla zboru podpisaŭ pad roznaha rodu pietycyjami. Paśla pietycyja nakiroŭvajecca ŭ adpaviednuju dziaržaŭnuju ŭstanovu.
Što važna: u adroźnieńnie ad bolš viadomaha anałaha Change.org, na biełaruskim sajcie treba ŭkazvać imia, proźvišča i adras, jak taho patrabuje zakanadaŭstva.
Tamu pietycyi z Change.org čynoŭniki mohuć ihnaravać, a zvaroty z Petitions.by jany musiać razhladać.
U pačatku lipienia na sajcie źjaviłasia pietycyja, pryśviečanaja situacyi z zajezdam u aeraport Minsk. Situacyja nastupnaja: kožny (naprykład, taksist) moža zajechać biaspłatna na terytoryju aeraporta tolki 2 razy za sutki. Za kožny nastupny zajezd treba było płacić aeraportu 10 rubloŭ. Varta patłumačyć: mašyny mahli znachodzicca na stajancy taksi biaspłatna, hrošy brali niepasredna za zajezd na terytoryju aeraporta. To-bok kab vysadzić čałavieka (ci zabrać jaho) pierad uvachodam u budynak aeraporta.
Pieravozčykam heta nie padabałasia, tym bolš što aeraport mieŭ ułasnuju słužbu tranśfiera, dla jakoj pieramiaščeńnie pa terytoryi aeraporta, naturalna, było biaspłatnym. Tamu astatnija pieravozčyki i stvaryli pietycyju: maŭlaŭ, stajanka taksi daloka ad zony prylotu, klijenty nie bačać mašyny, vychodziačy z aeraporta. Tamu pieravozčyki prasili zrabić stajanku dla taksi bližej i źniać abmiežavańni (bo aeraport patrabavaŭ, kab na stajanku pryjazdžali mašyny taksi, jakim nie bolš za 10 hadoŭ). Taksama pieravozčykaŭ aburyli vyniki madernizacyi schiemy ruchu pa terytoryi aeraporta, jakija ŭskładnili ich pracu.
Zvarot sabraŭ 360 podpisaŭ. Paśla ich nakiravali ŭ Ministerstva handlu i antymanapolnaha rehulavańnia.
Ale ž reakcyjaj Nacyjanalnaha aeraporta Minsk niečakana staŭ pazoŭ u sud. Pryčym padali mienavita na sajt pa zbory pietycyj. Aeraport choča, kab pietycyju vydalili, zamiest jaje na sajcie apublikavali abviaržeńnie: maŭlaŭ, źviestki ŭ pietycyi nie adpaviadali rečaisnaści.
U pres-słužbie Nacyjanalnaha aeraporta Minsk paćvierdzili, što sapraŭdy padali ŭ sud na placoŭku pa zbory podpisaŭ. Padrabiaźniej kamientavać situacyju kateharyčna admovilisia.
Padrychtoŭčaje sudovaje pasiadžeńnie adbudziecca 22 žniŭnia.
