U dzień 75-j hadaviny Varšaŭskaha paŭstańnia kiraŭnik MZS Polščy Čaputovič razam ź ministram zamiežnych spraŭ Hiermanii Hajka Maasam naviedali Muziej Varšaŭskaha paŭstańnia, paviedamlaje Polskaje radyjo.
Hajka Maas u svaim vystupie paprasiŭ prabačeńnie za toje, što niemcy zrabili ŭ časie vajny:
— Mnie soramna za toje, što niemcy ad imia Niamieččyny zrabili Polščy. Źniščeńnie stalicy było, adnak, asabliva ciomnym raździełam hetaj vajny, śviadomym udaram, zroblenym dla taho, kab źniščyć usio, što źjaŭlajecca polskaj tojesnaściu.
Polski kiraŭnik dypłamatyi Jacek Čaputovič skazaŭ, što dla Niamieččyny Polšča była pieraškodaj u płanach budovy impieryi. Jon nahadaŭ pra ździejśnienyja hitleraŭcami źniščeńni:
— Kryŭdy, zroblenyja Polščy i palakam, nie byli vypraŭlenyja. Palaki samyja, svaimi namahańniami i pracaj adbudavali źniščanuju stalicu. Hety fakt źjaŭlajecca vyraznaj ilustracyjaj bolš šyrokaj prablemy, jakaja nie dazvalaje nam ličyć pytańnie reparacyj zakrytym.
