Fota pravo.by.
Pieršaje pasiedžańnie ekśpiertnaj rady pa pytańniach pierakładu zakanadaŭčych aktaŭ na biełaruskuju movu adbyłosia 23 lipienia ŭ ofisie Nacyjanalnaha centra pravavoj infarmacyi.
U pracy rady ŭziali ŭdzieł pradstaŭniki Akademii navuk, Pałaty pradstaŭnikoŭ, Ministerstva kultury i Ministerstva justycyi, a taksama inšych dziaržaŭnych ustanovaŭ. Siarod prysutnych byŭ i vykonvajučy abaviazki rektara Nacyjanalnaha ŭniviersiteta imia Niła Hileviča Aleh Trusaŭ.
«Na dziva dobryja adčuvańni, — dzielicca Trusaŭ. — Płanavałasia, što rada pačnie pracu tolki ŭ vieraśni, a pieršaje pasiedžańnie ŭžo adbyłosia ŭ lipieni. Da kanca hoda płanujecca, što pierakładuć Kodeks ab šlubie i siamji, Vybarčy kodeks, a taksama chacia b pałovu Hramadzianskaha kodeksu».
Nad pierakładam buduć pracavać supracoŭniki Instytuta movaznaŭstva Akademii navuk. Kiravać pracesam budzie dyrektar hetaha instytuta Ihar Kapyłoŭ.
Aleh Trusaŭ kaža, što ŭłady navat vydzielili hrošy na pracu pierakładčykaŭ: «Ja nie viedaju, jakija tam sumy, ale dumaju, što pakryŭdžanym nichto nie zastaniecca».
Pytańnie ab pierakładzie zakanadaŭčych aktaŭ na biełaruskuju movu było pastaŭlenaje Aleham Trusavym u sakaviku padčas «Vialikaj razmovy» z udziełam Łukašenki.
«Niachaj ciapier maje «siabry» paradujucca, jakija pisali navošta Trusaŭ chodzić na sustrečy z prezidentam», — padcumoŭvaje Trusaŭ.
