Kab stać «žaleznym čałaviekam», treba 3,8 km prapłyć, 180 km prajechać na rovary i 42 km prabiehčy. Takija dystancyi ŭklučaje viadomaja honka Ironman. Dumajecie, pad siłu tolki prafiesijnym atletam? U Maksima Znaka ad pieršaj prabiežki da starta na 226 km prajšoŭ usiaho hod. Zajmacca sportam jon pačaŭ, kab schudnieć, a zaraz rehularna ŭdzielničaje ŭ marafonach i tryjatłonnych spabornictvach. Juryst raskazaŭ, jak vychodziŭ na start u navalnicu, kolki času na tydzień u jaho zajmajuć treniroŭki, ci sapraŭdy tryjatłon — adzin z samych darahich vidaŭ sportu i jak bieh uratavaŭ ad hałaŭnych bolaŭ.
Dyjety i masa
U dziacinstvie Maksim pierasprabavaŭ roznyja siekcyi — značnych pośpiechaŭ u sporcie nie było, tamu mianiaŭ ich štohod. U pieršym kłasie chadziŭ na dziudo: zapomniŭsia vypadak, kali zamiest treniroŭki chłopčyki ciahali cehłu dla budaŭnictva łaźni. Potym było płavańnie, taekvando, iznoŭ płavańnie (tolki padvodnaje), viełasport.
— Ale kłasa z vośmaha ja spyniŭ svaju «spartovuju karjeru» i zajmaŭsia vyklučna navučańniem i hitaraj. I heta pryviało mianie da značnych pośpiechaŭ u nabory vahi. Paśla ŭniviersiteta, kali pačaŭ pracavać jurystam, u mianie była vaha 107 kh, — raskazvaje Maksim.
Tak Maksim (sprava) vyhladaŭ niekalki hadoŭ tamu.
Chudzieć jon sprabavaŭ na dyjetach. Skinuŭ vahu da 80 kh. Ale jak tolki dyjeta spyniałasia, masa znoŭ rasła.
— Kali zaŭvažyŭ 92 kh na vahach, zrazumieŭ, što treba štości inšaje rabić. Na svaju biadu, ja daviedaŭsia, što jość Minski paŭmarafon, — heta byŭ 2015 hod. 11 červienia ja pajšoŭ na svaju pieršuju prabiežku. Dla mianie heta byŭ hieraičny podźvih: ja pieraadoleŭ 5 kiłamietraŭ, — uspaminaje mužčyna. — Ale sprava pajšła. Kali jość meta, to značna lahčej zajmacca sportam, čym kali heta prosta praces. Ty viedaješ, što kali nie budzieš vykonvać płan padrychtoŭki, to, chutčej za ŭsio, paŭmarafon nie prabiažyš.
Siońnia juryst važyć 77 kh.
Maksim na drobiaź nie raźmieńvaŭsia — na minskim starcie adrazu ŭziaŭ dystancyju ŭ 21 km. I ŭ tym ža vieraśni prabieh 42 km na marafonie ŭ Kijevie.
Nastupnaj metaj staŭ Ironman. Na padrychtoŭku ŭ Maksima było 9 miesiacaŭ. Jaho trenier takim tempam ździviŭsia: zvyčajna da dystancyi 226 km rychtujucca dva hady.
Samyja kłasnyja treniroŭki pačynajucca a 5-j ranicy
Kolki raz na tydzień trenirujucca kandydaty ŭ «žaleznyja ludzi»?
— Zaležyć ad taho, kolki čałaviek maje času na heta i čaho jon choča dasiahnuć na nastupnym starcie. Mnie zdajecca, kali ja pačynaŭ, u mianie było nie bolš za čatyry treniroŭki na tydzień i ŭ asnoŭnym ja kancentravaŭsia na biehu i płavańni. Ciapier składany pieryjad, bo chutka budzie Ironman. I ja pastaviŭ sabie ambitnuju metu — prajści honku mienš čym za 10 hadzin. Tamu treba rabić šmat trenirovak. U aŭtara «Biblii tryjatleta» Džo Fryła jość termin TSS (pakazčyk intensiŭnaści treniroŭki). 100 TSS — heta kali ty hadzinu kruciš piedali rovara na parohavaj mahutnaści. Frył kaža, kab paśpiachova vystupić na Ironman, treba na tydzień rabić 1000 TSS. Kab nablizicca da hetaj ličby, u mianie čatyry treniroŭki na rovary, adna pa płavańni, try biehavyja i dźvie ŭ trenažornaj zale — na vielmi abmiežavanuju kolkaść muskułaŭ (inšyja praktykavańni nielha, bo narastuć muskuły i tabie treba budziem potym ich z saboj vazić).
Maksim pryznajecca: napačatku dumaŭ, što času na ŭsio budzie brakavać.
Kab paśpiavać zajmacca, navat praktykavaŭ palifazny son — spaŭ pa dźvie hadziny. Ale zrazumieŭ, što heta nie vyjście.
— Nasamreč, nie byvaje takoha, što niama kali, — sprava tolki ŭ niapravilna rasstaŭlenych pryjarytetach. Ale treba viedać, dzie prachodzić miaža, bo heta moža być strašna, kali tryjatłon stanovicca hałoŭnym u žyćci. Treba niejak trymać bałans pamiž sportam, pracaj i siamjoj. U mianie taki varyjant — zvyčajna pieršuju treniroŭku ja rablu zranku. Kali ŭ niadzielu treba prajechać 150 km na rovary (heta 4,5 hadziny), ja startuju a 5-j ranicy — i ŭ 9.30 užo doma. A ludzi jašče śpiać u hety čas. Možna sumiaščać — biehčy na pracu ci z pracy. Hałoŭnaje — treba źmianić paradak na rabocie, kali mahčyma. Ja staŭ bolš daručać usiaho svaim małodšym kaleham. I lepiej stała ŭsim. I mnie, tamu što ŭ mianie jość čas, i im, tamu što źjaviłasia dadatkovaja praca, i navat klijentam, bo jany płaciać u vyniku mienš, bo moj čas kaštuje daražej.
Kolki honak u Maksima vypadaje na hod, składana padličyć. Naprykład, spabornictva, jakoje prachodziła na hetyja vychodnyja ŭ Minsku, z dystancyjaj 56 km dla mužčyny, pa sutnaści, zvyčajnaja treniroŭka. A voś starty na 113 i 226 km u jurysta byvajuć nie bolš za dva-try razy na hod. Pamiž imi pavinien być adpačynak tydniaŭ šeść, kab heta było efiektyŭna. Choć prafiesijnyja spartoŭcy mohuć startavać kožnyja dva tydni.
— U tryjatletaŭ zvyčajna pytajucca: a što samaje składanaje na honcy? Mnie zdajecca, dla ŭsich heta bieh. Prosta tamu, što ty ŭbivaješsia na rovary i, pakul dachodziš da biehu, užo nijakich sił na jaho nie zastajecca. Mienavita tamu ŭsiu zimu i zaraz ja zrabiŭ akcent na rovar — jon zajmaje 70% maich trenirovak.
Maksimu nie raz davodziłasia spaborničać u ekstremalnych umovach. Naprykład, u 32-hradusnuju śpioku ci navalnicu. Kali jedzieš na rovary z hary z chutkaściu 50—60 km u hadzinu i heta Narviehija, dzie vielmi rezkija pavaroty i nie bačna, što za imi, mokraja daroha robić honku niebiaśpiečnaj. Na tym ža starcie ŭ Narviehii daviałosia płyć u voziery, dzie tempieratura była ŭsiaho 16 hradusaŭ. Ale Maksim heta navat nie ŭsprymaje jak pieraškodu:
pa-pieršaje, hidrakaścium sahravaje, a pa-druhoje, 3,8 km pa vadzie dla jaho — samy prosty etap honki.
«Pieršy ryštunak kaštavaŭ $1500»
Tryjatłon nazyvajuć adnym z samych darahich vidaŭ sportu. Nasamreč, kaža Maksim, mahčymaść nabyć ryštunak znachodziać ludzi z roznym finansavym uzroŭniem.
— Navat kali my zajmajemsia tolki płavańniem, možna kupić sabie płaŭki karbonavyja za $600 i z pahardaj hladzieć na tych, u kaho za 10. Toje ž samaje ź inšym ryštunkam dla spabornictvaŭ. Samaje darahoje — heta, kaniečnie, rovar. Možna znajści patrymany za $500, a možna za 25 tysiač jeŭra.
Kali ja rabiŭ svoj pieršy Ironman, uvieś ryštunak — razam z hidrakaściumam, rovaram, tuflami, «cackami» dla płavańnia — całkam kaštavaŭ niedzie $1500. Ale ciapier heta inšaja ličba. Kali mnie raniej zdavałasia, što rovar za $2000 — heta kašmar, to ciapier dumaju: narmalna, tanna.
Za honki taksama treba płacić. Udzieł u firmovym Ironman kaštuje kala 500 jeŭra. Mienš raskručanyja starty tańniejšyja. Naprykład, dystancyja 113 km (pałova standartnaj) na Ironman — heta 300 jeŭra, na jakim-niebudź jeŭrapiejskim spabornictvie — 150 jeŭra, a ŭ nas — kala 50 rubloŭ. Možna znajści varyjant, jaki zadavolić ciabie i pa łahistycy, i pa košcie. Naprykład, pajechać u Polšču ci Rasiju.
Siabry i siamja da Maksimavaha chobi ŭžo pryzvyčailisia.
Maksim ź siamjoj.
— Kali blizkija nie zmahli b z hetym źmirycca, napeŭna, ja zastaŭsia b sam-nasam z tryjatłonam jašče z 2015 hoda, — śmiajecca juryst. — Ale maja siamja mianie padtrymlivaje. Jany prychodziać na spabornictvy, dapamahajuć jak techničnaja kamanda pa zabieśpiačeńni siłkavańnia, pa łahistycy i inšym. U tryjatletaŭ jość taki vid adpačynku, jak spartovy turyzm. Kali my jedziem kudyści na spabornictva, to zastajomsia jašče na niekalki dzion, kab pahladzieć krainu. Usio całkam mienš za tydzień zajmaje. U hetym hodzie my ŭžo byli tak u Ispanii, Narviehii, pajedziem u Aŭstryju.
Žonka Maksima Nadzieja za zvańnie «žaleznaha čałavieka» nie zmahajecca — zajmajecca fihurnym katańniem i konnym sportam. A voś 11-hadovamu synu Alesiu padabajecca ŭdzielničać u zabiehach i atrymlivać miedali. Jon jak sapraŭdny prafiesijanał, žartuje tata: vystupaje na spabornictvach, nie trenirujučysia.
«Za apošnija hady źjavilisia i novyja siabry — chłopcy i dziaŭčaty z tryjatłonnaha kłuba».
«Raniej ad hałaŭnoha bolu tolki tabletki ratavali»
Navošta paśpiachovamu jurystu ŭsie hetyja honki?
— Čałaviek — takaja istota, jakoj vielmi važna rabić mini-dasiahnieńni, kab byli momanty, jakija varta ŭspaminać.
Kožny raz, kali zaviaršaješ honku, niavažna ź jakim vynikam — heta jarkaja padzieja, i jak by ciažka tabie ni było, na finišy ŭžo dumaješ: a dzie moj nastupny start? Zaniatki sportam robiać čałavieka lepšym — atrymlivaješ upeŭnienaść, što možaš dasiahnuć luboj mety. Cykličnyja vidy sportu vielmi matyvacyjnyja — bačyš, što siońnia daješ rady lepš, čym učora. I razam z tym bieham, rovaram ci płavańniem pačynajucca niejkija inšyja źmieny. Kali ty možaš pračnucca a 5-j ranicy, kab prajechać na rovary 150 km, to niejkija chatnija ci pracoŭnyja rečy padajucca značna praściejšymi. Vola ŭ tryjatłonie trenirujecca raniej za muskuły.
Maksim raskazvaje, što, pakul nie pačaŭ biehać, hałava baleła rehularna: praca, dakumienty, kampjutary, telefony. Mužčyna zaŭsiody nasiŭ z saboj «bajavy kaktejl» — kietanof i spazmałhon. Pa dźvie tabletki prymaŭ — i tolki heta ratavała. A jak staŭ biehać, boli źnikli.
— Kali niešta drennaje zdaryłasia, prabiažycie chacia b kiłamietraŭ 15—16 da Minskaha mora, padychajcie fitancydami — i prablemy kudyści padzienucca. Tym, chto kaža, što sport — heta marnavańnie času, u mianie jość adkaz.
