Honka źbiare bolš za 800 darosłych biehunoŭ i kala 200 dziaciej. Bolš za ŭsio budzie biełarusaŭ, ukraincaŭ i rasijan. Taksama pryjeduć spartoŭcy z Danii, Estonii, Polščy, Čechii i Bielhii, prylaciać navat ź Jehipta, Izraila i ZŠA.
Dziela honki buduć pierakrytyja centralnyja vulicy, u tym liku praśpiekt Pieramožcaŭ. Paśla chutkasnaha zapłyvu ŭ Centry parusnaha sportu ŭdzielniki prajeduć na rovarach da Pałaca sportu, dzie i prabiahuć apošnija adrezki pa anałohii ź Minskim paŭmarafonam.
Honka adkryta jak dla daśviedčanych spartoŭcaŭ, tak i dla pačatkoŭcaŭ. Trapić u śpis udzielnikaŭ možna paśla rehistracyi. Tam ža možna abrać dystancyju ci zapisać dzietak — ich kličuć na honku TriKids. Dziaciej ad 6 da 10 hadoŭ čakaje zabieh na 500 m, a školniki ad 11 da 13 hadoŭ zmohuć prapłyści 100 m i prabiehčy 1 km.
Siarod junych udzielnikaŭ buduć i dzieci z aŭtyzmam: na praciahu navučalnaha hoda jany vučylisia płavać i ciapier płanujuć pieraadoleć svaju pieršuju ironman-miažu. Kiraŭnikom inkluziŭnaha prajekta i hałoŭnym trenieram vystupaje dvuchrazovaja alimpijskaja pryziorka Alaksandra Hierasimienia.
Kožnaha ŭdzielnika čakaje startavy pakiet, jaki ŭklučaje majku, šapačku dla płavańnia, zaplečnik, numar z pajasnoj humkaj, čyp elektronnaj adznaki, Racebook i strachoŭku. Kožny, chto finišuje, atrymaje jašče i miedal. Dabracca da miesca startu možna z dapamohaj biaspłatnaha tranśfieru.
Da honki ŭ Minsku prachodziać biaspłatnyja treniroŭki. Kožny achvotny moža prajści bazavy kurs i padrychtavać siabie da spabornictva.
Honka maje i sacyjalnuju misiju: płanujecca sabrać srodki na padrychtoŭku śpiecyjalistaŭ pa pracy z asablivymi dziećmi. Hrošy buduć pieradadzienyja partnioru inkluziŭnaha spartyŭnaha prajekta — MDHA «Dzieci. Aŭtyzm. Baćki».
Alfa-Bank Minsk Triathlon projdzie ŭ Minsku ŭ druhi raz. Arhanizatarami vystupajuć «Kłub tryjatłona «Trystajł» i Alfa-Bank, a padtrymku akazvajuć Minharvykankam, Minabłvykankam i Ministerstva sportu i turyzmu.
Bolš spartyŭnych padziej šukajcie na Afisha.nn.by
