Tut.by
Hałoŭnym śledčym upraŭleńniem Śledčaha kamiteta zavieršana rasśledavańnie kryminalnaj spravy ab trahiedyi ŭ siaredniaj škole №2 horada Stoŭbcy, paviedamlaje pres-słužba SK.
Nahadajem, što 11 lutaha dziesiacikłaśnik udaryŭ nažom nastaŭnicu historyi i hramadaznaŭstva i vučnia 11-ha kłasa, jakija pamierli na miescy zdareńnia.
U chodzie rasśledavańnia adnoŭlenaja chranałohija zdareńnia, adznačaje SK.
Pa dadzienych śledstva, abvinavačvany, kirujučysia chulihanskimi matyvami, pierad zabojstvam nanios udar małatkom adnakłaśniku, paraniŭšy jaho.
Zatym nanios nastaŭnicy nažom nie mienš za dva ŭdary. Vybieh z kabinieta i pryčyniŭ nažavyja ranieńni dvum adnakłaśnikam, jakija sprabavali jaho zatrymać. Zatym jon zajšoŭ u inšy kabiniet i nanios udary nažom vučniu 11-kłasa.
Zatym vyjšaŭ u kalidor, dzie pahražaŭ nažom namieśniku dyrektara i nastaŭniku bijałohii, spuściŭsia ŭ viestybiul, dzie pahražaŭ nažom adnakłaśnicy i padrapaŭ im joj šyju. Potym źbieh ź miesca zdareńnia.
Zhodna z zaklučeńniem kompleksnaj stacyjanarnaj psichołaha-psichijatryčnaj ekśpiertyzy, praviedzienaj DKSE, padletak moh u poŭnaj miery ŭśviedamlać značeńnie svaich dziejańniaŭ i kiravać imi.
Śledčymi pradjaŭlena abvinavačańnie ŭ ździajśnieńni nastupnych złačynstvaŭ:
— zabojstva dźviuch asob z asablivaj žorstkaściu z chulihanskich mierkavańniaŭ (č. 2 art. 139);
— zamach na zabojstva dźviuch asob z asablivaj žorstkaściu z chulihanskich mierkavańniaŭ (č. 1 art. 14 č. 2 art. 139);
— asabliva złosnaje chulihanstva (č. 3 art. 339).
Svaju vinu padletak pryznaŭ častkova. Raniej užytaja da jaho miera strymańnia ŭ vyhladzie źniavoleńnia nie źmianiałasia.
Kryminalnaja sprava pieradadziena prakuroru dla nakiravańnia ŭ sud.
«Celiŭ u horła»: stali viadomyja padrabiaznaści zdareńnia ŭ Stoŭbcach, dzie školnik zarezaŭ nastaŭnicu i vučnia
Čamu jon? Baćka chłopca, jakoha zabili ŭ Stoŭbcach, padrabiazna raskazaŭ pra syna i dzień jaho śmierci
