Juryj Hradaŭ. Fota časopisa «Kim być?»
Zasłužany architektar Biełarusi Juryj Hradaŭ adznačaje 85-hodździe.
U tandemie ź inšymi biełaruskimi architektarami Juryj Hradaŭ pracavaŭ nad stvareńniem miemaryjalnych kompleksaŭ «Chatyń» (1969), «Praryŭ» (1974, va Ušackim rajonie), «Kaciuša» (1966, u Oršy).
Juryj Michajłavič Hradaŭ naradziŭsia ŭ 1934 hodzie ŭ Čarapaŭcy Vałahodskaj vobłaści Rasii. U 1958 hodzie skončyŭ Maskoŭski architekturny instytut, a ŭ 1960-m pierajechaŭ u Minsk. Z 1960 pa 1993 hod architektar pracavaŭ u instytucie «Minskprajekt». Asnoŭnymi pracami Hradava tut źjaŭlajucca rekanstrukcyja centra Minska (prajekt 1974 hoda, kiraŭnik aŭtarskaha kalektyvu), prajekty detalovaj płaniroŭki i zabudovy praśpiekta Mašerava (ciapier praśpiekta Pieramožcaŭ), rekanstrukcyi i dobraŭparadkavańnia Trajeckaha pradmieścia, paviljon Respublikanskaha vystavačnaha centra Biełarusi (1968 hod), budynak MUS (1979 hod), stancyja mietrapalitena «Płošča Lenina» (1984 hod).
Jon taksama viadomy jak aŭtar pomnikaŭ Ja.Kupału i Ja.Kołasu ŭ Minsku (1972 hod), pomnika M.Hastełu i jaho ekipažu kala Radaškovičaŭ (1976 hod, usie ŭ suaŭtarstvie), ansambla «Astrołah» na płoščy Zorak ŭ histaryčnym centry Mahilova (2004 h.).
Adna z samych viadomych rabot Juryja Hradava — miemaryjalny kompleks «Chatyń». Hety architekturna-skulpturny ansambl stvaraŭsia na praciahu troch hadoŭ. Razam ź Juryjem Michajłavičam nad miemaryjałam pracavali architektary Valancin Zankovič i Leanid Levin, skulptar Siarhiej Sielichanaŭ. Miemaryjalny kompleks staŭ miescam ŭsienarodnaha smutku i vizitnaj kartkaj Biełarusi.
Fota wikimedia.org.
Havoračy ab miemaryjalnym kompleksie, Juryj Hradaŭ nazvaŭ jaho pomnikam-dakumientam, tamu što heta dakumientalnaje śviedčańnie trahiedyi Chatyni. Tut vykarystany dva kolery — šery (koler smutku, trahiedyi) i bieły (koler pamiaci). Ansambl niasie dvajny sens — apoviad pra trahiedyju Biełarusi i jaje adradžeńnie.
22 sakavika 2019 hoda, u dzień trahiedyi Chatyni, miemaryjał naviedali ministr zamiežnych spraŭ Biełarusi Uładzimir Makiej i kiraŭniki zamiežnych dypłamatyčnych misij.
Adna z apošnich rabot majstra — skulptura «Maleńki prync», ustalavanaja na pryvakzalnaj płoščy Nacyjanalnaha aeraporta Minsk da II Jeŭrapiejskich hulniaŭ. Heta vynik sumiesnaj tvorčaści Juryja Hradava i skulptara Kanstancina Sielichanava.
