Lidčanin Alaksiej Barmataŭ kupiŭ kvateru ŭ 2016 hodzie, u joj užo byli ŭstalavanyja dźviery, jakija adčyniajucca vonki. Ale susiedcy heta nie spadabałasia, i jana padała na mužčynu ŭ sud. I chacia sudovaja sprava zavieršanaja nie na karyść Alaksieja, dźviery pierastaŭlać jon nie dumaje.
«Naša Niva» pahutaryła z abaimi ŭdzielnikami kanfliktu. Voś što jany raskazali:
Alaksiej Barmataŭ: «Praz hetyja dźviery ja nie maju prava pakidać miežy Biełarusi»
«Kvateru, u techpašparcie jakoj było napisana, što dźviery adčyniajucca vonki, ja kupiŭ jašče ŭ 2016 hodzie. Pačaŭ ramont, pamianiaŭ dźviery, ale napramak ich adkryćcia nie mianiaŭ. Ale chto ž viedaŭ, što majoj susiedkaj pa leśvičnaj placoŭcy budzie prafiesijnaja skaržnica?
83-hadovaja susiedka stała skardzicca ŭ ŽEU, na haračyja linii.
U 2018 hodzie padała na mianie ŭ sud. I vyjhrała jaho. I heta pry tym, što ŭ našym padjedzie ŭnutr adčyniajucca tolki dźviery ŭ adnoj kvatery, u hetaj samaj susiedki!
Alaksiej Barmataŭ žyvie ŭ kvatery № 25, jaho susiedka — u 26-j.
Jaje asnoŭny arhumient, što jana invalid, maje prablemy sa zrokam, i baicca, što maje dźviery jaje mohuć traŭmavać. Ja pytaŭsia, ci zdarałasia takoje raniej, jana adkazvaje, što nie.
Ale sud byŭ na baku piensijanierki. Prytym što za hod da majoj spravy vynies roŭna supraćlehłaje rašeńnie pa anałahičnaj situacyi.
Dy i ŭ kvaterach u samich sudździaŭ dźviery adčyniajucca vonki, vidać, taksama z parušeńniem.
Mnie z zajzdrosnaj rehularnaściu dasyłajuć štrafy za nievykanańnie rašeńnie suda. Pieršy štraf byŭ 10 bazavych vieličyń. Apłaciŭ.
Siońnia mnie zabaroniena pakidać miežy Biełarusi, kiravać aŭtamabilem, ale dźviery ja pieraŭstaloŭvać nie budu.
Čamu? Dy tamu, što, kali jany buduć stajać unutr, jana znojdzie inšuju pryčynu, pa jakoj pryčapicca.
Prosty prykład. La našaha doma jość ciomny zakutočak, kudy lubili schavacca miascovyja ałkaholiki. Susied, što žyvie nad hetym zakutočkam, pastaviŭ tam aharodžu, raźbiŭ kłumbu, zrabiŭ pryhažość. Dyk heta susiedka stała pisać skarhi, što praz toje, što ciapier tam rehularna palivajucca kvietki, u jaje ad vilhaci ŭ padvale ćvicie bulba».
Susiedka Iryna Čarnych: «Ja nie źbirajusia ciarpieć jaho vychadki»
Mnie 83 hady, 50 apošnich hadoŭ ja žyvu ŭ hetym domie. U 2003 hodzie haspadary susiedskaj kvatery ŭžo stavili dźviery, jakija adkryvalisia vonki. U 2014 novyja susiedzi pastavili dźviery, jakija adkryvalisia ŭnutr. Heta ŭžo piaty ci šosty haspadar, i jon znoŭ robić tak, jak zručna tolki jamu.
Kali jaho dźviery adčyniajucca vonki, ja nie mahu ni vyjści, ni zajści ŭ svaju kvateru adnačasova ź im. I ja bajusia, što adnojčy jon budzie adčyniać dźviery, kali ja budu stajać na placoŭcy, i pierałomić mnie ŭsie rebry ručkaj svaich dźviarej.
Kali jon pačaŭ ramont, u našym vykankamie prachodziła haračaja linija. Ja dazvaniłasia da staršyni vykankama, na nastupny dzień pryjechali rabotniki ŽEU. Jany i vynosili rašeńnie, što dźviery stajać niezakonna, niapravilna.
Ja nie viedaju, kolki mnie zastałosia žyć, ale ja nie budu da śmierci ciarpieć vychadki svajho susieda. Jość rašeńnie suda. Ja nie razumieju, čamu jon skardzicca na mianie.
