U astatnich krainach kantynientalnaj Jeŭropy da kanca hetaha tydnia taksama čakajecca pieravyšeńnie siarednich červieńskich tempieratur na 10—15 hradusaŭ.
Pryčyny pahodnaj anamalii — štorm u Paŭnočnaj Atłantycy i mahutny antycykłon, jaki ŭstalavaŭsia ŭ Centralnaj Jeŭropie.
Ich kambinacyja pryvodzić da taho, što na kantynient zasmoktvaje patok raspalenaha pavietra z Sachary. Kolki heta budzie doŭžycca, pakul niezrazumieła.
Sinoptyki papiaredžvajuć: leta 2019 hoda stanie ŭ Jeŭropie samym haračym ad 2003 hoda, kali anałahičnaja pahodnaja anamalija za lipień i žnivień zabrała dziasiatki tysiač žyćciaŭ.
«Pieryjady anamalna haračaha nadvorja — biasšumnyja zabojcy. U 2003 hodzie takaja anamalija zabrała ŭ Jeŭropie 70 tysiač žyćciaŭ… Haračaje leta minułaha hoda ŭ Hiermanii pryviało da śmierci pa mienšaj miery 1000 čałaviek», — piša ŭ «Tvitary» klimatołah Patsdamskaha univiersiteta Štefan Ramštorf.
Na hety raz, kažuć navukoŭcy, achviar moža być navat bolš, pakolki leta tolki pačałosia i mnohija jeŭrapiejcy jašče nie paśpieli adaptavacca da vysokich tempieratur.
Najharačej budzie ŭ niekatorych rehijonach Francyi i Ispanii: tam słupok termomietra nie apuścicca nižej za + 40 °C try dni zapar — ad sierady da piatnicy.
Pry hetym francuzskija ŚMI ŭžo paviedamlajuć ab troch zahinułych ad «tempieraturnaha šoku» adpačyvalnikaŭ: 62-hadovaja žančyna i dvoje mužčyn, 70 i 75 hadoŭ, pamierli ad sardečnaha prystupu, zajšoŭšy ŭ prachałodnuju vadu paśla doŭhaha lažańnia na plažy.
«Piekła nadychodzić», — reziumavała ispanski mietearołah Silvija Łapłana, i hety tvit raźlacieŭsia pa siecivie z chutkaściu virusa.
Jašče adzin tvit, jaki šyroka razyšoŭsia, paraŭnoŭvaje kartu prahnozu ŭ Francyi na čaćvier 27 červienia ź viadomaj karcinaj Edvarda Munka «Kryk».
Pa słovach jaho aŭtara Rubiena Chałali, za 15 hadoŭ pracy ŭ mieteasłužbie jon nie bačyŭ ničoha padobnaha.
