IBA IT Park piać hadoŭ pracuje nad technałohijaj apłaty kartkami ŭ transparcie. Vadzim Smatrajeŭ, dyrektar techničnaha adździaleńnia kampanii, raspavioŭ u intervju dev.by pra asablivaści hetaj sistemy.
Fota dev.by.
Kali ŭ mianie ŭ kašalku dźvie kartki: prajazny, bankaŭskaja, lubyja ich spałučeńni — ź jakoj śpišacca pajezdka?
Na hetaje pytańnie nichto adnaznačna nie adkaža. My havorym pra fizičnyja pracesy. Jość rydar — jon ža validatar — jon vypramieńvaje chvalu. Jość kartka — pasiŭnaja pryłada. Kali kartka traplaje ŭ chvalu — źjaŭlajecca tok, kartka pačynaje pracavać. Jakaja kartka adreahuje, zaležyć ad mnohich faktaraŭ: ad taŭščyni kašalka, ad taho, ź jakoha boku lažać kartki, ci niama folhi albo inšych prasłojek, ad jakaści čypa i anteny. U roznych bankaŭ roznyja kartki: roznyja vytvorcy, roznyja čypy, roznyja anteny. Tamu nielha skazać, ź jakoj kartki śpišacca apłata. Taja, jakaja pieršaj adhukniecca, — taja i «pieramoža».
U bieskantaktavych technałohijach jość taki praces: antykalizija. Voś heta i jość toj miechanizm, jaki dazvalaje vybrać adnu kartku, kali ŭ elektramahnitnaje pole traplajuć adnačasova niekalki. Ale heta ŭ łabaratornych umovach, «u vakuumie». Kali kartki ŭ vas u kašalku, to antykalizija moža i nie spracavać: naprykład, adna kartka lažyć za santymietr ad vokładki, a druhaja —za piać santymietraŭ, — sihnał prosta moža nie dajści.
Pavodle praviłaŭ płaciežnych sistem, kali ŭ poli apynulisia dźvie kartki, — to rydar nie pavinien prymać nivodnuju ź ich.
Spracuje antykalizija, źjavicca nadpis «admova» ci anałahičnaja. Z bankaŭskaj kartkaj my možam pracavać tolki tady, kali dakładna razumiejem, što ŭ pole jana adna. I pakul kartka nie vyjdzie z pola, nijakaja inšaja kartka ŭ apłacie ŭdzielničać nie budzie. Ale kali ŭ vas u kašalku niekalki kart, a ŭ rukach, da prykładu, lohkija dryžyki, — to apłata moža być paśladoŭna śpisana i dva razy: heta budzie rasceniena jak «prykłaŭ kartku — prybraŭ — znoŭ prykłaŭ».
Z transpartnaj kartkaj situacyja inšaja, bo čyp u joj bolš prosty, i karta moža spracavać chutčej, čym bankaŭskaja, choć praviły antykalizii raspaŭsiudžvajucca i na jaje. I kali ŭ nas dźvie kartki — prajazny i bankaŭskaja — to ŭ takim vypadku akurat pačynajuć dziejničać siła chvali, chutkaść spracoŭvańnia kartki i hetak dalej. Tak što kali chočacie pahulać u ruletku, prykładvajcie kašalok ź niekalkimi kartkami.
I ŭ nas, i ŭ Łondanie, i paŭsiul u praviłach napisana: pavažanyja pasažyry, pierad apłataj padrychtujcie tuju kartku, jakoj chočacie apłacić prajezd. Toje samaje tyčycca i situacyj, kali ŭ vas u kašalku lažać niekalki prajaznych.
Čamu tranzakcyi abjadnoŭvajucca i hrošy z kartki śpisvajucca raz na try dni?
Jość miechanizmy, jakija dazvalajuć kiravać tranzakcyjnaj nahruzkaj. Sistema raspracoŭvajecca jak masavaja, i ŭ hadziny pik hetyja miechanizmy dazvalajuć kiravać nahruzkaj, kab usie tranzakcyi apracoŭvalisia jakasna. Ź inšaha boku, bank ładzić akcyi i ŭładalnikam peŭnych kart časam dazvalaje prachodzić u mietro biaspłatna. Heta značyć, pracuje miechanizm źnižak.
Ciapier sistema pracuje tak: ahrehuje albo 3 pajezdki, albo pajezdki na praciahu 48 hadzin z momantu pieršaha prachodu. Takoje abmiežavańnie — prośba našaha partniora, BPS-Śbierbanka.
Ludzi, jakija pracujuć z bankaŭskimi kartkami, viedajuć, što kryteryi pamieru kamisii — heta knižačka taŭščynioj z palec. U zaležnaści ad banka, ad praduktu, — hetaja taryfikacyja vielmi składanaja. Tak što hetaje pytańnie treba zadać banku, jaki raźličvaje svoj adsotak ekvajrynhu: jak jon farmirujecca, kolki jon vydatkoŭvaje na aŭtaryzacyi. Ale dumaju, što nie biez hetaha: tak vyhadniej.
