Fiestyval džazavych viečaroŭ sioleta źbiare ŭ stalicy muzykaŭ ź Bielhii, Italii, Šviecyi, Isłandyi i ZŠA.
Siomy siezon džazavych subotnich viečaroŭ la Ratušy adkryjuć 22 červienia Bielhija i Italija. Karaleŭstva pradstavić kvartet pad kiraŭnictvam vykanaŭcy z Paŭdniova-Afrykanskaj Respubliki Tutu Puoŭn (Tutu Puoane Belgian Quartet). Uładalnica paŭdniovaafrykanskaj muzyčnaj premii za najlepšy tradycyjny džazavy albom 2011 hoda abiacaje zadać ton usiamu fiestyvalu. Italiju ŭ hety viečar pradstavić Nikoła Konte, jaki spraktykavaŭsia ŭ styli Acid jazz. Dakładniej, apracavaŭ žanr pad siabie, zamiašaŭšy ŭ adnym fłakonie tradycyjnuju indyjskuju muzyku, saŭndtreki ź italjanskich filmaŭ 1960-ch i brazilskuju bosa-nova.
U subotu, 29 červienia, vystupić tandem Šviecyi i Isłandyi. Prychilniki apošnich žartujuć, maŭlaŭ, isłandcy Mezzoforte hrajuć samy haračy džaz i fank-fjužn. Žarty žartami, ale kalektyŭ ličycca adnym z najstarejšych u Jeŭropie: aktyŭna vystupajuć z 1977-ha, vypuścili 14 albomaŭ i 6 zbornikaŭ.
Šviedaŭ pradstavić talenavity kampazitar i aranžyroŭščyk, saksafanist Mahnus Lindhren, jaki źmiešvaje džaz i kłasiku, ekśpierymientuje sa šviedskim falkłoram, brazilskaj sambaj i tradycyjnaj afrykanskaj muzykaj. I z adnolkavym natchnieńniem supracoŭničaje jak z vybitnymi muzykami, tak i ź nievialikimi džazavymi kalektyvami.
Zakryjuć «Viečary» 6 lipienia muzyki z ZŠA. Džoi de Frančeska — amierykanski muzykant u čaćviortym pakaleńni, virtuozny džazavy arhanist i vakalist, dvojčy naminant na premiju «Hremi». I pačućciovy, mieładyčny, aŭtentyčny amierykanski siamiejny džazavy duet u asobie Markusa i Žan Bejłor (The Baylor Project). Paru taksama naminavali adrazu na dźvie premii «Hremi»: najlepšaje tradycyjnaje vykanańnie R&B i najlepšy džazavy vakalny albom. Hetaja para vykonvaje džaz ź dzivosnymi notami hośpieła, bluzu i soŭła.
Šukajcie bolš imprez na Afisha.nn.by
