U siaredzinie červienia Leanid Hapanovič u vioscy Biaźvierchavičy Słuckaha rajona adkryŭ biblijateku dla miascovych žycharoŭ. Jana znachodzicca ŭ hazietnym kijosku i nazyvajecca «U Safii» — u honar adnoj z unučak. Tam bolš za 2000 knih z archiva Leanida i inšych słuččakoŭ: kłasičnaja litaratura, dziciačaja, fantastyka, pryhody, histaryčnyja ramany, knihi pa vajennaj tematycy. Jość taksama haziety i časopisy, piša Infa-Kurjer.
Jak raspavioŭ «Kurjeru» Leanid Hapanovič, ideja stvareńnia takoj biblijateki źjaviłasia paŭhoda tamu paśla taho, jak jon padvoziŭ u horad miascovuju žycharku, jakaja jechała ŭ haradskuju biblijateku pamianiać knihi. U vioscy biblijateki ŭžo niama niekalki hadoŭ: pierastała pracavać paśla rasfarmiravańnia kłuba, kaža Leanid.
Ideju miascovaha žychara padtrymała i Valancina Ražaniec, deputat Pałaty pradstaŭnikoŭ.
Narodnaja biblijateka ŭ Biaźvierchavičach adroźnivajecca ad zvyčajnaj: naprykład, tam niama biblijatekara i abaniemientaŭ. Pracuje tolki pa vychodnych z 10 da 18 hadzin. Kali Leanid Hapanovič u adpačynku, to i ŭ budnija dni. Ludzi mohuć pryjści i ŭziać lubuju kolkaść knih, a potym viarnuć. Zaraz stvaralnik biblijateki zajmajecca vopisam usich knih.
