U redakcyju Svabody dasłali aŭdyjo, na jakim čuvać, jak z vučniaŭ 180-j siaredniaj škoły Miensku patrabujuć zdać hrošy za padpisku na dziaržaŭnyja hazietu i časopis. U razmovie nastaŭnica pierachodzić na kryk.
«Ja što, sabie na pomnik źbiraju? Što, rubiel vosiemdziesiat takija vialikija hrošy?» — padvyšanym tonam źviartajecca da dziaciej nastaŭnica. I žalicca, što za tych, chto admaŭlajecca zdavać, jana budzie vymušana dakłaści z ułasnaj kišeni — a ŭ jaje, maŭlaŭ, i tak užo ŭłasnaja padpiska na «Nastaŭnickuju hazietu».
U małarazborlivaj razmovie vučniaŭ na zadnim planie čuvać nazva viedamasnaha vydańnia Ministerstva pa nadzvyčajnych situacyjach «Junyj spasatiel» — jano rehularna fihuruje ŭ skarhach baćkoŭ i dziaciej na prymusovuju padpisku.
«Svaboda» spytała ŭ dyrektarki SŠ № 180 Iryny Daniłovič, ci jość u ichnaj škole prymusovaja padpiska na dziaržvydańni.
«U nas takoha być nie moža, bo ŭsie dzieci sami zacikaŭlenyja. Adnaznačna nie», — adkazała jana.
«Heta banalny šantaž i vymahalnictva» — tak prakamientavała situacyju z prymusovaj padpiskaj ekśpiert u halinie adukacyi Jaŭhienija Pastarnak. Letaś jana źviartałasia z adkrytym listom da hałoŭnaha redaktara haziety «SB. Biełaruś siehodnia» z zaklikam pakłaści kaniec prymusovaj padpiscy na jaho vydańnie.
«Ministerstva adukacyi niadaŭna vypuściła čarhovaje rasparadžeńnie ab tym, što nichto nie maje prava prymušać nikoha da padpiski. Čarhovaje «bła-bła-bła». Fiška ŭ tym, što ministerstva havoryć adno, a vykankamy — inšaje. U škoły situacyja niezajzdrosnaja, tamu što jana ŭ lubym vypadku «atrymaje pa hałavie». Kali jany nie buduć padpisvacca, «atrymajuć na hałavie» ad svajho niepasrednaha načalstva — upraŭleńnia adukacyi vykankama, tamu što normy na padpisku spuskajucca adtul. A kali chto-niebudź vykładzie taki zapis i dakaža, što kahości prymušali padpisvacca, to jany tym bolš «atrymajuć pa hałavaje», tamu što Ministerstva adukacyi skazała, što nielha prymušać padpisvacca. Jany — krajnija ŭ lubym vypadku», — kaža Jaŭhienija Pastarnak.
Jana dadaje, što ŭ situacyi z padpiskaj «ŭsio heta — na sumleńni baćkoŭ».
«Da taho času, pakul baćki dajuć hrošy, pakul jany padpisvajucca, hetaja ahidnaść budzie praciahvacca».
