Mižnarodny trybunał AAN pa marskim pravie (ITLOS) pastanaviŭ, što Rasija pavinna vyzvalić 24 ukrainskich marakoŭ, zatrymanych padčas incydentu ŭ rajonie Kierčanskaha praliva, i pieradać Ukrainie try kanfiskavanyja sudny. Pra heta zajaviŭ u subotu sudździa, staršynia na słuchańniach u Hamburhu.
Ukrainski bok pierad pasiadžeńniem paprasiŭ trybunał «pradpisać Rasii viarnuć ukrainskija karabli», «nieadkładna vyzvalić 24 zatrymanych marakoŭ i dazvolić im viarnucca va Ukrainu», «spynić kryminalny pieraśled marakoŭ i ŭstrymlivacca ad novych rasśledavańniaŭ», paviedamlaje tass.ru.
Trybunał paličyŭ «metazhodnymi» pieršyja dva patrabavańni Kijeva, adnak pryjšoŭ da vysnovy, što «nie ličyć nieabchodnym» patrabavać ad Maskvy spynić kryminalny pieraśled i ŭstrymacca ad ŭzbudžeńnia novych spraŭ, choć i ličyć, što heta było b razumna, adznačyŭ kiraŭnik trybunała.
Trybunał zaklikaŭ abodva baki paźbiahać krokaŭ, jakija mohuć pryvieści da «abvastreńnia vielmi napružanaj situacyi» ŭ Kierčanskim pralivie. Jak dadaŭ Pak Čžyn Chion, Rasija i Ukraina pavinny da 25 červienia hetaha hoda padać svaje spravazdačy i bačańnie situacyi pa Kierčanskim incydencie.
Raniej Maskva apaviaściła trybunał ab tym, što nie budzie ŭdzielničać u słuchańniach.
U vierbalnaj nocie, nakiravanaj u instancyju ambasadaj Rasiei ŭ FRH, adznačałasia, što, z punktu hledžańnia rasijskaha boku, u Trybunała niama jurysdykcyi dla razhladu kierčanskaha incydentu. 10 maja trybunał zasłuchaŭ arhumienty ŭkrainskaha boku.
Prezident Ukrainy Uładzimir Zialenski prakamientavaŭ u svaim fejsbuku rašeńnie Trybunała AAN pa spravie incydentu ŭ Kierčanskim pralivie.
Pavodle jaho słovaŭ, vykanańnie RF rašeńnia Mižnarodnaha trybunału moža stać pieršym sihnałam z boku rasijskaha kiraŭnictva pra realnuju hatoŭnaść da spynieńnia kanfliktu z Ukrainaj. «Takim čynam Rasija moža zrabić krok da razbłakavańnia pieramovaŭ i vyrašeńnia stvoranych joju prablem cyvilizavanym sposabam», — adznačyŭ Zialenski.