Premjer-ministr Rasii Dźmitryj Miadźviedzieŭ vydatna painfarmavany ab pracy, jakaja viadziecca Maskvoj i Minskam. Pra heta RBK zajaviŭ pasoł Rasii ŭ Biełarusi Michaił Babič, adkazvajučy na niadaŭnija vykazvańni ministra zamiežnych spraŭ Biełarusi Uładzimira Makieja.
18 krasavika, kamientujučy paviedamleńni ab nakiravanych Rasijaj Biełarusi prapanovach pa dalejšaj intehracyi, Makiej zajaviŭ: «Ale Dźmitryj Anatoljevič, mahčyma, nie ŭ kursie, što my ŭžo daŭno nakiravali našy prapanovy ŭ adkaz».
«Što tyčycca zajavy spadara Makieja, to jon, mabyć, nie ŭ kursie, što Dźmitryj Miadźviedzieŭ źjaŭlajecca nie tolki staršynioj urada Rasii, ale i členam Vyšejšaha dziaržaŭnaha savieta Sajuznaj dziaržavy, staršynioj savieta ministraŭ Sajuznaj dziaržavy. I ŭsie rašeńni, jakija prymajucca ŭ sajuznaj dziaržavie, im ŭzhadniajucca, a bolšaść ź ich realizujucca pad jaho niepasrednym kiraŭnictvam. Lepš by spadaru Makieju heta ŭ svajoj pracy ŭličvać», — skazaŭ rasijski ambasadar RBK.
Pa słovach Babiča, «praca pa aktualizacyi pałažeńniaŭ Sajuznaha dahavora, uzroŭniu dalejšaj ekanamičnaj intehracyi našych dziaržaŭ nie spyniajecca ni na chvilinu». «My z partniorami znachodzimsia ŭ pastajannym dyjałohu, u tym liku abmieńvajemsia nieabchodnymi dakumientami. Pra chod pieramoŭ rasijski bok rehularna dakładvaje prezidentu i staršyni ŭrada, atrymlivajem ad ich ukazańni i ruchajemsia dalej», — padkreśliŭ Babič.
