Eks-prezident Hruzii Michaił Saakašvili adkazaŭ na zakidy Alaksandra Łukašenki zroblenyja ŭčora biełaruskim kiraŭnikom u intervju tureckamu infarmacyjnamu ahienctvu «Anadału».
«Darahi spadar Łukašenka, kali łaska, nie błytajcie niešta z palcam. Ja i Parašenka, jak kažuć u nas u Adesie — heta dźvie vialikija roźnicy, i ŭ inšych krainach ja nie «chavajusia», mianie prosta časova nie puskajuć u maje krainy», — napisaŭ jon u svaim fejsbuku.
Nahadajem, što ŭčora Alaksandr Łukašenka zajaviŭ, što nie budzie zajmacca analitykaj i paraŭnoŭvać dvuch kandydataŭ: Piatra Parašenku i Uładzimira Zialenskaha.
«Adnaho ja vielmi dobra viedaju. Druhoha ja bačyŭ tolki ŭ kino, ja jaho jak palityka nie viedaju. Ale ja vam skažu ad žyćcia: u nas z Parašenkam byŭ kaliści ahulny siabar — heta Michaił Saakašvili. Kali Saakašvili pravodziŭ vybary, budučy prezidentam (Hruzii), kanstytucyju pamianiaŭ, jašče niešta — pačali z narodam zajmacca žartami. Heta pryviało da taho, što jamu daviałosia pakinuć Hruziju i chavacca ŭ inšych krainach.
Kab Parašenku nie pryjšłosia załazić na dach i z dachu zaklikać ukraincaŭ abaranić jaho, jon zrobić usio dla taho, kab ukraincy jaho padtrymali. Jon pavinien zrabić usio dla taho, kab narod padtrymaŭ jaho», — padkreśliŭ jon.
Treba taksama zaznačyć, što Saakašvili, jaki staŭ prezidentam u studzieni 2004 hoda, na fonie pratestaŭ u listapadzie 2007 hoda padaŭ u adstaŭku i ŭ studzieni 2008 hoda paŭtorna vyjhraŭ vybary. A ŭ kastryčniku 2013 hoda vybary vyjhraŭ Hieorhij Marhviełašvili, bo pavodle Kanstytucyi, Saakašvili nie mieŭ prava bałatavacca na treci termin. Saakašvili, nie čakajučy zakančeńnia prezidenckaha terminu, pakinuŭ Hruziju i vylacieŭ u Brusel.
A na dach eks-kiraŭnik Hruzii załaziŭ užo ŭ Kijevie ŭ śniežni 2017 hoda.
Słužba biaśpieki Ukrainy abvinavaciła palityka «ŭ sadziejničańni ŭdzielnikam złačynnych arhanizacyj i ŭtojvańni ich złačynnaj dziejnaści». Śćviardžajecca, što Saakašvili ŭvajšoŭ u kantakty z ahientami Rasii i byłym ukrainskim ministram pa padatkach i zborach Kurčankam, jaki chavajecca ŭ Rasii i padazrajecca ŭ zdradzie radzimie.
