U efir najbujniejšaha ŭkrainskaha telekanała 1+1 vyjšaŭ treci siezon papularnaha sieryjała «Słuha naroda». Supierrejtynhavy sieryjał vyjšaŭ za niekalki dzion da pieršaha tura prezidenckich vybaraŭ va Ukrainie, na jakich adnym z favarytaŭ źjaŭlajecca ŭkrainski komik i miedyjamieniedžar Uładzimir Zialenski, jaki syhraŭ hałoŭnuju rolu ŭ «Słuzie naroda» — pazityŭnaha, ščyraha, addanaha Ukrainie prezidenta Vasila Hałabarodźki.
Film talenavita, u jarkaj mastackaj formie i adnačasova biaźlitasna ekspłuatuje vobrazy sučasnych ukrainskich palityčnych realij, vyśmiejvajučy ŭkrainski palityčny kłas i ŭzvyšajučy Hałabarodźku-Zialenskaha.
Sieryjał faktyčna pieratvaryŭsia ŭ trochhadzinny pieradvybarčy rolik Uładzimira Zialenskaha. I jon realna zmoža paŭpłyvać na vyniki majučych adbycca vybaraŭ.
Novy siezon «Słuhi naroda» składajecca z troch sieryj. Kali pierakazać koratka, pieršaja sieryja — pra toje, jak kiepska budzie, kali prezidentam Ukrainy zastaniecca Parašenka, druhaja sieryja — što budzie, kali prezidentam stanie Cimašenka, treciaja sieryja — pra toje, jak raskvitnieje Ukraina pry Zialenskim. Proźviščy ŭ sieryjale inšyja, ale kožny, chto znajomy z sučasnaj ukrainskaj palityčnaj scenaj, paznaje hałoŭnych asob.
U pieršaj sieryi prezidentam stanovicca Surykaŭ (aluzija na Parašenku), a hałoŭny stanoŭčy hieroj Hałabarodźka traplaje ŭ turmu.
Hałabarodźka ŭ turmie.
Naprykład, pra Surykava ŭ filmie paviedamlajecca, što jon prapanavaŭ aliharcham zarablać na schiemie impartu vuhalu «Amsterdam+»; u jaho — «kazačnyja kramy kala kožnaj stancyi mietro», tolki prezident Surykaŭ handluje małočnaj pradukcyjaj, a nie cukierkami, jak Parašenka. Abyhrali scenarysty navat chvarobu Parašenki. Kali ciapierašni prezident Ukrainy, niahledziačy na svoj kandytarski biźnies, nie moža jeści cukierki, tamu što chvareje na dyjabiet, to ŭ Surykava sa «Słuhi naroda» anałahičnaja prablema — niepieranosnaść łaktozy, praź jakuju jon nie moža ŭžyvać pradukcyju svajoj kampanii. Kali Surykaŭ staŭ prezidentam, svoj biznes jon pieradaŭ «ślapomu trastu» (takaja ž historyja była i z Roshen), jon vałodaje Trecim kanałam (Parašenka — Piatym), adpačyvaje jon na Maldyvach. Zhadvajecca ŭ sieryjale i skandał va «Ukrabaronpramie». Navat žestami Surykaŭ nahadvaje ciapierašniaha ŭkrainskaha prezidenta.
Prezident Surykaŭ.
Chcivaść da hrošaj zahubiła prezidenta-biźniesmena Surykava. Praź vialikuju kolkaść karupcyjnych schiem adbyŭsia «Małočny Majdan», u vyniku jakoha Surykavu abjavili impičmient, a novym kiraŭnikom Ukrainy stała Barysienka (pramaja aluzija na Juliju Cimašenka).
Barysienka dbaje pra svaje kaściumy, ekspłuatuje vobraz strohaha školnaha zavuča, nosić modnyja darahija akulary, abiacaje panizić canu na elektryčnaść u 2 razy. Praź vialikuju kolkaść papulistyčnych abiacanak Barysienka vymušana iści na dadatkovuju emisiju hrošaj, što viadzie da hipierinflacyi i čarhovaha kryzisu.
Barysienka.
Va Ukrainie zdarajecca čarhovy Majdan, ułada pierachodzić u ruki «Nacyjanalnych družyn», mianiajecca 6 prezidentaŭ, dziaržava razvalvajecca na 28 asobnych kniastvaŭ, jakimi kirujuć miascovyja kniaźki. Naprykład, kiraŭnikom «Čarnamorskaj kanfiederacyi», jakaja ŭźnikła na miescy Adeskaj vobłaści, staŭ były prezident Surykaŭ (aluzija na Parašenku). Nahadajem, Piatro Parašenka źjaŭlajecca ŭradžencam Adeskaj vobłaści.
Dla taho, kab znoŭ abjadnać krainu, z turmy vypuskajuć Hałabarodźku i robiać jaho prezidentam. Adnak kniastvy nie chočuć abjadnoŭvacca z Ukrainaj, jakaja skaraciłasia da pamieraŭ Kijeŭskaj vobłaści. I tady mudry Hałabarodźka pačynaje zajmacca ekanomikaj. Ukraina adnaŭlajecca, pryčym mietady hetaha adnaŭleńnia na 100% supadajuć ź pieradvybarčaj prahramaj Uładzimira Zialenskaha: skasavańnie deputackaj niedatykalnaści, farmiravańnie prezidenckaj kamandy z maładych śpiecyjalistaŭ na konkursnaj asnovie, elektronnaja demakratyja, siłaviki pierastajuć zajmacca ekanamičnymi złačynstvami i h.d. I tut, jak u najlepšych utopijach, nastupaje roskvit: u sieryjale pakazvajuć budaŭnictva novych daroh, rabatyzavanych zavodaŭ, pabudavanych za hrošy zamiežnych inviestaraŭ, ukrainskija ahraryi źbirajuć vialikija ŭradžai pšanicy, a ŭkrainskich aliharchaŭ uziali pad kantrol. Razroźnienaja dziaržava pačynaje abjadnoŭvacca, kniastvy prosiacca nazad u skład Ukrainy.
Tolki dźvie terytoryi nie mohuć damovicca. Halickaje karaleŭstva (Lvoŭskaja vobłaść) nie suprać viarnucca ŭ skład Ukrainy, ale tolki pry ŭmovie, kali tam nie budzie dziaržavy «SSSR» (Danieckaja i Łuhanskaja vobłaści). Toje ž samaje i «SSSR», jany hatovyja być u składzie Ukrainy, ale biez Haliččyny.
Ale situacyju mianiaje niaščasny vypadak — na lvoŭskaj šachcie adbyłasia avaryja, dziasiatki harniakoŭ akazalisia pad ziamloj. Nichto ich nie moža vyratavać, akramia kaleh z «SSSR», jakija majuć padobnyja šachty i adpaviednuju padrychtoŭku. Kiraŭnictva «SSSR» pad pahrozaj śmiarotnaha pakarańnia zabaraniaje svaim šachcioram jechać u Halickaje karaleŭstva. Ale, niahledziačy na pahrozy, jany, ruskamoŭnyja danieckija šachciory, pryjazdžajuć i ratujuć svaich halickich kaleh. Napeŭna, heta była najmacniejšaja dramatyčnaja scena ŭsiaho sieryjała, vielmi blizkaja da sučasnych ukrainskich realij. U vyniku Danbas i Haliččyna zabyvajuć pra staryja kryŭdy i viartajucca ŭ skład Ukrainy. Praŭda, jak u skład Ukrainy viarnuŭsia Krym, u sieryjale nie havorycca. Jak nie kaža pra heta i kandydat Zialenski.
Lvoŭskija i danieckija šachciory vitajuć adzin adnaho i abjadnoŭvajuć krainu.
Jeŭrapiejskija struktury, «Vialikaja siamiorka» i MVF pakazvajucca ŭ sieryjale ŭ karykaturnym niehatyŭnym śviatle. Jany — adny z vorahaŭ Hałabarodźki. Jany tolki hatovyja pazyčać Ukrainie hrošy, kab jana zastavałasia syravinnym i ahrarnym prydatkam Jeŭropy. A voś dazvolić prezidentu Hałabarodźku pačać kaśmičnuju prahramu Ukrainy jany nie chočuć, prapanavaŭšy, u takim vypadku, viarnuć usie pazyki. I tady ŭkraincy źbirajuć usiu svaju majomaść, u tym liku załatyja zuby i ŭpryhažeńni, i prynosiać ich na Majdan Niezaležnaści, i takim čynam dziaržava spłačvaje ŭsie svaje pazyki.
Uvieś hety siužet, pavodle sieryjała, apisvaje svaim studentam univiersitecki vykładčyk u 2049 hodzie, u idealnaj Ukrainie budučyni. Va Ukrainie, jakaja ŭvajšła ŭ top-20 ekanomik śvietu, jakaja pieratvaryłasia ŭ kaśmičnuju zvyšdziaržavu. I ŭsio heta dziakujučy mudramu Hałabarodźku.
Niedachopaŭ u sieryjała bolš čym dastatkova. «Słuha naroda — 3» paŭtaraje staryja kramloŭskija prapahandysckija naratyvy, što majdany mohuć arhanizoŭvacca tolki aliharchami i što jany zaŭsiody viaduć da chaosu i źbiadnieńnia nasielnictva. Dla demanstracyi novych aliharchičnych majdanaŭ u sieryjale vykarystoŭvalisia kadry Revalucyi Hodnaści, što vyklikaje spraviadlivaje abureńnie ŭ tych ludziej, jakija za ideju stajali na sapraŭdnym Majdanie. Kultyvuje film i stereatypny rehijanalny padzieł Ukrainy.
U toj ža čas «Słuha naroda — 3» źjaŭlajecca mocnym mastackim instrumientam, jaki realna zmoža paŭpłyvać na prezidenckija vybary 31 sakavika va Ukrainie.
Ciažka skazać, jakim budzie Zialenski palitykam (i ci budzie jon palitykam). Ale Zialenski — hienijalny kinapradziusar, jaki stvaryŭ sapraŭdny šedeŭr vybarčaj kampanii.
