Na łavie padsudnych Viarchoŭnaha suda Ispanii apynucca 12 palitykaŭ, u tym liku były vice-prezident Ženieralitata (urada) Katałonii Aryjol Žunkieras. Sudździ pavinny vyznačyć ich rolu ŭ arhanizacyi refierendumu 1 kastryčnika 2017 hoda i ŭ adnabakovym abviaščeńni niezaležnaści Katałonii.
Słuchańni ŭ Viarchoŭnym sudzie buduć tranślavacca ŭ žyvym efiry.
Paviedamlajecca, što ranicaj u aŭtorak u Viarchoŭny sud prybyŭ dziejučy kiraŭnik Ženieralitata Katałonii Kim Tora i bolš za 50 jaho paplečnikaŭ.
«Siońnia pačynajecca sudovy praces, jakoha naohuł nie moža być u demakratyčnaj krainie», — zajaviła Elisenda Pałuźje, staršynia Nacyjanalnaj asamblei Katałonii (arhanizacyja, jakaja vystupaje za niezaležnaść rehijona). Pry hetym jana zaklikała prychilnikaŭ niezaležnaści Katałonii mabilizavacca suprać sudovaha pracesu.
Raniej u Katałonii pieraścierahali, što abvinavaŭčyja prysudy byłym katałonskim palitykam tolki pahłybiać isnujučy kryzis.
Prakurory patrabujuć 25 hadoŭ turmy dla lidara Katałonskaj respublikanskaj levaj partyi Aryjola Žunkierasa, 17 hadoŭ dla lidara Katałonskaj nacyjanalnaj asamblei, jakaja dapamahała rychtavać refierendum, Žordzi Sančasa i jašče troch čałaviek. Vaśmi inšym padsudnym pahražajuć turemnyja terminy da 16 hadoŭ.
Abvinavačanyja ŭžo 16 miesiacaŭ znachodziacca za kratami, u kancy minułaha hoda ich pieraviali ŭ turmu niedaloka ad Barsiełony.
Heta najbujniejšaja palityčnaja sprava ŭ Ispanii paśla niaŭdałaj zmovy ŭ 1981 hodzie, kali aficery Hramadzianskaj hvardyi šturmavali ispanski parłamient i abstrelvali deputataŭ, jakija hałasavali za abrańnie premjer-ministra. Troje lidaraŭ buntu atrymali tady 30 hadoŭ turmy, jašče 30 čałaviek atrymali mienšyja prysudy.
