Ministerstva infarmacyi vyniesła papiaredžańni redakcyi i zasnavalniku niedziaržaŭnaha histaryčna-litaraturnaha časopisa «Lidski letapisiec».
Abodva papiaredžańni padpisała 31 traŭnia namieśnica ministra infarmacyi Lilija Ananič. Zasnavalniku stavicca ŭ vinu toje, što jon svoječasova nie paviedamiŭ mininfarmacyi pra źmienu pieryjadyčnaści vypusku časopisa (art. 11 Zakona «Ab druku i inšych ŚMI»). Redakcyju ž źvinavačvajuć u tym, što ŭ vychodnych dadzienych niekalkich numaroŭ byli pryviedzieny nie adpaviednyja rečaisnaści daty vychadu ŭ śviet (art. 26 zakona ab druku), a taksama toje, što jana nie zrabiła svoječasovaj rassyłki abaviazkovych biaspłatnych asobnikaŭ časopisa (art. 27 zakona ab druku).
Redaktar časopisa Stanisłaŭ Sudnik (viadomy taksama jak redaktar haziety Tavarystva biełaruskaja movy «Naša słova») źbirajecca ŭ najbližejšy čas rabić zachady dla vypraŭleńnia znojdzienych ministerstvam pamyłak.
Krajaznaŭčy, histaryčna-litaraturny časopis «Lidski letapisiec» vychodzić z 1997 h. nakładam 400 asobnikaŭ. Zasnavalnikam vydańnia źjaŭlajecca staršy navukovy supracoŭnik Lidskaha histaryčna-mastackaha muzieja Valery Śliŭkin.
Pres-słužba HA «Biełaruskaja asacyjacyja žurnalistaŭ»
