Bolš za 150 čałaviek sabralisia 4 lutaha ŭ Maračoŭščynie (Ivacevicki rajon Bieraściejščyny) na dzień narodzinaŭ Tadevuša Kaściuški (1746—1817), paviedamlaje «Radyjo Svaboda».
Na radzimu Tadevuša Kaściuški pryjechali dyplamaty ZŠA, Polščy, Ukrainy, Švajcaryi, było šmat inšych haściej ź Miensku, Bieraścia, Baranavičaŭ, Kobrynia.
Jany ŭskłali kvietki i vianki da pomnika Kaściušku, jaki byŭ pastaŭleny ŭ 2018 hodzie. Na ŭračystaściach łunali bieł-čyrvona-biełyja, čyrvona-zialonyja i žoŭta-błakitny ściahi. Haściej prymała kiraŭnictva Ivacevickaha rajvykankamu.
U siadzibie-muzei ŭračysta adkryli mastackuju vystavu «Syn svajoj Radzimy», pryśviečanuju žyćciu Tadevuša Kaściuški, a taksama miaścinam, źviazanym ź im. Vystavu arhanizavaŭ Hieneralny kansulat Polščy ŭ Bieraści.
Pavieranaja ŭ spravach ZŠA ŭ Biełarusi Dženifer Mur pryhadała pra ideały svabody, jakija byli važnymi dla Kaściuški, dzie b jon ni byŭ.
«Dla mianie vialiki honar siońnia być tut, kab addać daninu pavahi Tadevušu Kaściušku. Jon byŭ patryjotam nia tolki svajoj krainy, ale i patryjotam usiaho śvietu. U majoj krainie, u Złučanych Štatach, jon adyhraŭ vielmi važnuju rolu ŭ vajnie za niezaležnaść i karystajecca vialikaj pavahaj usich amerykancaŭ. Tamu ja vielmi rada być tut siońnia i pradstaŭlać svaju krainu, svoj urad i svoj narod na hetaj imprezie. Pryhadvajecca jaho cytata, što pieršy krok da svabody — heta asensavańnie taho, što hetaja svaboda jość nieabchodnaściu», — skazała Dženifer Mur.
Kiraŭnik fondu imia Tadevuša Kaściuški Leanid Nieściarčuk ź Bieraścia vykazaŭ padziaku ambasadzie ZŠA, jakaja vydzieliła letaś 12 tysiač dalaraŭ na ramont dachu siadziby-muzeju Kaściuški.
«My ŭsie lubim Kaściušku, my ŭsie lubim kožny svaju Baćkaŭščynu, jak lubiŭ jaje Tadevuš Kaściuška. Niekali my dačakajemsia, što ŭ adnoŭlenych pałacach hetaha asiarodka źbiarucca prezydenty roznych krain śvietu i pacisnuć ruki za mir i za siabroŭstva», — skazaŭ Leanid Nieściarčuk.
