Sud nad Siarhiejem Laškievičam pakinuŭ šmat pytańniaŭ. Čamu ŭ inicyjatyŭnuju hrupu ŭziali starońnich ludziej z sumnieŭnaj reputacyjaj? Chto byŭ toj utojeny śviedka «Navahran», praź jakoha chłopiec zahrymieŭ pa kryminalnym artykule?
Nahadajem, što adzin sa śviedkaŭ, niechta Navahran, na sud nie źjaviŭsia, matyvujučy heta stracham fizyčnaj raspravy. Ankietnyja źviestki Navahrana, u tym liku proźvišča, byli źmienienyja ŭ metach jahonaj biaśpieki. Jaho śviedčańni, zroblenyja padčas śledčych mierapryjemstvaŭ začytali ŭ sudzie. Ź ich vynikaje, što Siarhiej Laškievič i jaho paplečniki viali antydziaržaŭnuju dziejnaść i jašče ŭ listapadzie minułaha hodu schilali jaho da ŭdziełu ŭ masavych akcyjach.
U dziejačoŭ biełaruskaha ruchu z Ščučyna jość mierkavańnie, chto chavajecca za źmienienym proźviščam. Amal na 100% jany peŭnyja ŭ kankretnym čałavieku, jakomu, pa ich słovach, nia strašna, a paprostu soramna za svoj učynak. Padčas vybarčaj kampanii 2001 h. jon sprabavaŭ trapić u skład inicyjatyŭnaj hrupy Siamiona Domaša. Jak kažuć tahačasnyja aktyvisty domašaŭskaha štabu, vielmi cikaviŭsia materyjalnym bokam pracy, ale byŭ rasčaravany i syšoŭ u inicyjatyŭnuju hrupu inšaha kandydata na prezydenty.
U časie taho zboru podpisaŭ jon uvajšoŭ u pryjacielskija adnosiny ź Siarhiejem Laškievičam. Byŭ znajomy i ź inšymi demakratyčnymi aktyvistami. Pavodle słovaŭ siabroŭ inicyjatyŭnaj hrupy Milinkieviča, z taho hodu hety čałaviek palityčnaj aktyŭnaści nie prajaŭlaŭ, z pradstaŭnikami demakratyčnaha asiarodku spyniŭ usialakija kantakty i pra jaho amal zabyli. Źviartaje na siabie ŭvahu i toj fakt, što hety čałaviek niejak dzialiŭsia ŭražańniami ad vajskovaj słužby pad kamandavańniem Paŭličenki.
Sud nad S.Laškievičam na tle ahulnaha razmachu represijaŭ nia dzivić, choć artykuł, pavodle jakoha jaho sudzili, pakul dla Biełarusi ekzatyčny.
Uražvaje i inšaje: ź jakoj lohkaściu ŭ inicyjatyŭnuju hrupu brali starońnich ludziej z sumnieŭnaj reputacyjaj. Siabry ščučynskaj supołki BNF kažuć na heta nastupnaje: «My – adkrytaja struktura, nia sekta i nie padpolščyki. Tamu prymajem dapamohu ad usich achvotnikaŭ. A času, kab praviarać ankietnyja źviestki kožnaha, chto prapanuje dapamohu, prosta niama».
Siamion Piečanko
