Biełaruskaja milicyja adsočvaje aptečki sa składoŭ i bambaschovišč časoŭ SSSR. Jak akazałasia, u ich jość preparaty, jakija mohuć vykarystoŭvać narkahandlary, piša hazieta «Na stražie».
Fota: MUS.
U vieraśni minułaha hoda ŭ Minsku ŭ zakinutym bambaschoviščy na vulicy Aeradromnaj milicyjanty znajšli 180 starych indyvidualnych aptečak (AI-2). Jak akazałasia, u ich byŭ psichaaktyŭny preparat «Taren».
Z 1979 hoda jon uvachodziŭ u nabory miedykamientaŭ abaronnych i sacyjalnych pradpryjemstvaŭ. A vykarystoŭvaŭsia jak lakarstva ad atručeńniaŭ. 10 hadoŭ tamu jaho zabaranili i «Taren» treba było źniščyć. Ale, jak akazałasia, heta patrabavańnie vykanali nie va ŭsich vypadkach.
Tak u 2017 hodzie ŭ Viciebsku milicyjanty złavili dvuch maładych ludziej — u ich była partyja hetaha rečyva, jakoha chapiła by na sotni doz. Adzin ź ich skazaŭ, što znajšoŭ preparat u starym bambaschoviščy.
Vyjaŭleny pad ziamloj preparat praź vientylacyjnuju šachtu chłopiec dastavaŭ razam z 16-hadovym školnikam. Zatrymanyja taksama paviedamili pra inšyja padobnyja miescy z «Tarenam». Naprykład, u bambaschoviščy fabryki «KIM» milicyja znajšła kala 10 000 tabletak.
A ŭ krasaviku 2018 hoda ŭ pole zroku milicyi trapiŭ žychar Viciebskaha rajona. U jaho taksama zachoŭvaŭsia «Taren». Mužčyna zajaviŭ, što nie pamiataje, adkul uziałasia staraja aptečka, a ŭ aptečcy jon zachoŭvaŭ rybałoŭnyja kručki. Ekśpiertyza pakazała, što mužčyna narkotyki nie ŭžyvaje.
U listapadzie hetaha ž hoda žančyna ź vioski Vyhada pieradała milicyi 40 tabletak «Tarena». Jany lažali ŭ jaje ŭ haražy ŭ starych aptečkach, jakija zastalisia ad papiaredniaha haspadara.
