Kaardynatarka prahram šviedskaha miedyjainstytuta Fojo Volha Vale nakiroŭvałasia ŭ Minsk pa zaprašeńni HA «Biełaruskaja asacyjacyja žurnalistaŭ» na sustreču z maładymi žurnalistami.
Udzień 25 studzienia Volha Vale była zatrymana supracoŭnikami pamiežnaj słužby Nacyjanalnaha aeraporta Minsk. Žurnalistcy paviedamili, što jana nie moža trapić u Biełaruś, bo znachodzicca ŭ śpisie asobaŭ, jakim nie pažadany ŭjezd na terytoryju Rasijskaj Fiederacyi.
Biełaruś ź niadaŭniaha času maje ahulny «čorny śpis» z Rasijaj, tamu ŭ našu krainu Volhu taksama nie puścili. Jana vymušana viartacca ŭ Ryhu zvarotnym rejsam.
— My źviarnulisia ŭ pamiežnuju słužbu aeraporta i na haračuju liniju Pamiežnaha kamiteta Biełarusi, dzie paćvierdzili dadzienuju infarmacyju. Pavodle pamiežnikaŭ, Volha Vale znachodzicca ŭ rasijskim «čornym śpisie», tamu trapić u Biełaruś nie moža. Supracoŭniki pamiežnaha kamiteta rajać źviartacca ŭ aficyjnyja orhany Rasijskaj Fiederacyi, — raskazaŭ pres-słužbie HA «Biełaruskaja asacyjacyja žurnalistaŭ» namieśnik staršyni arhanizacyi Aleh Ahiejeŭ.
Šviedski miedyjainstytut Fojo bolš za 15 hadoŭ supracoŭničaje z žurnalisckimi arhanizacyjami ŭ Biełarusi, ź jaho padtrymkaju byŭ realizavany šerah prahram z HA «Biełaruskaja asacyjacyja žurnalistaŭ», Biełaruskim sajuzam žurnalistaŭ, Instytutam žurnalistyki BDU.
Raniej nijakich ekscesaŭ z naviedvańniem Biełarusi ŭ supracoŭnikaŭ Fojo nie ŭźnikała.
Heta nie pieršy raz, kali biełaruskija ŭłady, kirujučysia rasijskim «čornym śpisam», departavali ci nie puskali ŭ krainu zamiežnych hramadzian.
HA «Biełaruskaja asacyjacyja žurnalistaŭ» vykazvaje abureńnie ŭ suviazi ź incydentam. Na dumku kiraŭnictva arhanizacyi, mierkavańnie orhanaŭ ułady Rasijskaj Fiederacyi nie pavinna ŭpłyvać na partniorskija prahramy i kantakty pamiž arhanizacyjami Biełarusi, Šviecyi i inšych krain.
