Biełaruski nacyjanalny kanhres vyznačyŭsia sa svajoj stratehijaj na prezidenckija vybary. Dva dziasiatki čałaviek, jaki pradstaŭlali roznyja rehijony krainy, vyrašyli, što ichnim kandydatam stanie Mikałaj Statkievič. Chacia dyskusii byli vielmi haračymi.
Vystupaje Mikoła Statkievič
Što takoje Biełaruski nacyjanalny kanhres? Heta kaalicyja samych radykalnych u adnosinach da ŭładaŭ arhanizacyj. U jaje ŭvachodzić i niezarehistravanaja «Narodnaja Hramada» Statkieviča, i «Jeŭrapiejskaja Biełaruś» Andreja Sańnikava, jakuju padtrymlivaje «Chartyja», i prafsajuz REP Hienadzia Fiadyniča, i palityk-adzinočka Uładzimir Niaklajeŭ. Kampanija roznaja, ale zhodnaja ŭ tym, što ŭładu treba mianiać jak maha chutčej.
Ahułam u ofis REP pryjechała i pryjšło dva dziasiatki čałaviek.
Intryhi z vyłučeńniem asablivaj nie adbyłosia. Adzinaje proźvišča, jakoje prahučała jak proźvišča imaviernaha kandydata, — heta Mikałaj Statkievič. «Suśvietna viadomy palitviazień», — nazvaŭ jaho barysaŭski dysident Alaksandr Abramovič.
«A Statkievič maje prava vyłučacca?» — pačułasia pytańnie z zały. «Pavodle Kanstytucyi — tak, pa zakonie — nie», — imhnienna adreahavaŭ Statkievič. Jon pierakanany, što Kanstytucyja nijak nie abmiažoŭvaje jahonyja pravy, a voś u Vybarčym kodeksie jość patrabavańnie, što ŭ kandydata nie pavinna być niaźniataj sudzimaści.
Uładzimir Niaklajeŭ, jaki vioŭ mierapryjemstva, skazaŭ, što jon uvohule doŭha vahaŭsia, ci varta brać udzieł u hetych vybarach, ale schiliŭsia za, kab nie paŭtaryŭsia scenar 2015 hoda: «Samyja haniebnyja vybary ŭ historyi Biełarusi, z kazakami, z padtancoŭkaj, z apieretaj. Ja heta vielmi ciažka pieražyvaŭ».
Uładzimir Niaklajeŭ
Druhoj pryčynaj Niaklajeŭ nazvaŭ pahrozu niezaležnaści Biełarusi. «U mianie zastalisia siabry ŭ Maskvie, ja viedaju, jak adbyvalisia pieramovy Pucina i Łukašenki. Stvoranyja kamisii pa zdačy našaj niezaležnaści. Ja praz heta načami pračynajusia i nie mahu spać», — pryznavaŭsia Uładzimir Prakopavič.
Jašče jon pryznaŭsia ŭ tym, što Statkievič prapanoŭvaŭ jamu być kandydatam, ale paet admoviŭ. «Tady vyłučacca budu ja», — pieradavaŭ Niaklajeŭ słovy Statkieviča.
Była i jašče adna prapanova: vyłučyć adrazu troch kandydataŭ, usich z sudzimaściami — Statkieviča, Fiadyniča i Sańnikava, ale jaje chutka zabyli. «Meta adna — źmianić uładu», — kazaŭ Niaklajeŭ.
Mabyć, samym niečakanym vystup atrymaŭsia ŭ prafsajuznaha lidara Hienadzia Fiadyniča. «Ja budu kazać ščyra — pa-inšamu prosta nie ŭmieju».
Hienadź Fiadynič
«Usio heta nahadvaje tanny pijar, — pačaŭ svaju pramovu Fiadynič. — «Narodnaja Hramada» — heta małaja hrupka ludziej, BNK — krychu bolšaja, ale taksama małaja.
Nie niezaležnaść zaraz chvaluje ludziej, a ich dabrabyt. Vy kažacie, što ŭsie viedajuć patryjota Statkieviča, ale jaho viedajuć tolki patryjoty. Vyjdzicie na Kamaroŭku i spytajciesia, chto viedaje. Adna «Chartyja» nie daje poŭny achop ludziej, asabliva ŭ rehijonach. A što Statkievič piša ŭ svaim fejsbuku? Pra niejkich dzievak, jakich ciahaje Łukašenka. Kali jon choča być kandydatam, to pavinien być vyšej za ŭsiu hetuju hraź. Nikoha ŭłada nie zarehistruje. Kab zarehistravali Statkieviča, treba vyvieści na vulicu 20 tysiač čałaviek. My hatovyja da takoha? Nie hatovyja. Zachad nas nie padtrymaje, bo zabłytaŭsia ŭ toj hieapalityčnaj hulni. Rasija — heta kryž», — tak emacyjna skazaŭ Fiadynič. Praŭda, apładysmienty nie pačulisia.
«Za nami ludziej praktyčna niama, — pryznaŭsia viadomy dziejač Vacłaŭ Areška. — Davajcie adkładziem vyłučeńnie da viasny. Hałoŭnaje — nie asoba, a prahrama».
Kaardynatar «Jeŭrapiejskaj Biełarusi» Jaŭhien Afnahiel upiorsia kułakami ŭ stoł: «Nie zhodny, što ludziej niama. Ludzi jość. I jany chočuć pačuć adkaz na pytańnie: chto, kali nie Łuka?»
Jaŭhien Afnahiel
Ad Salihorska na sustrečy byŭ baćka biznesoŭca i byłoha maładafrontaŭca Ivana Šyły Uładzimir. «My nie pieramožam na vybarach, — z sumam kanstatavaŭ jon. — Ja nie ŭpeŭnieny navat, što źbiarom 100 tysiač podpisaŭ. Ja rasčaravany, što niama adzinaha kandydata, ale ja hatovy pracavać na Mikałaja Statkieviča, bo vielmi pavažaju hetaha čałavieka».
Uładzimir Šyła
Sam Statkievič pačaŭ adkazvać na słovy Fiadyniča: maŭlaŭ, Hienadź, kali ciabie sudziać, to nie važna, kolki čałaviek my vyviedziem da Administracyi prezidenta.
«Važna, Mikoła», — paryravaŭ Fiadynič.
«Važna, ale nie hałoŭnaje», — nie zhadziŭsia Statkievič.
2010 hod, kali była razahnanaja Płošča, jon nazvaŭ «vydatnym». «Niekali my pakažam unukam, što nie źmirylisia z uładaj Łukašenki, što byŭ 1996 hod, 1999, 2006, 2010, 2017».
Na prajmieryz jon rašuča nie zhodny. «Z kim iści na prajmieryz? Z tymi ludźmi, jakija letaś pabiehli skardzicca čynoŭnikam, kali my mahli atrymać i mitynh, i kancert?».
Nie pahadziŭsia jon ź Fiadyničam i pra toje, što nie treba pisać pra «dzievak, jakich ciahaje Łukašenka». «Kali niešta źmienicca, to ŭsie heta pisać buduć, ale treba, kab i ciapier niechta kazaŭ», — pierakanany Statkievič.
Uładzimir Niaklajeŭ u svaju čarhu zapeŭniŭ, što bolš za jaho pracy pa adzinym kandydacie nie rabiŭ nichto, ale zaŭsiody znachodzilisia tyja, chto jaje zryvaŭ u apošni momant. «U 2015 takimi byli Alaksiej Janukievič z Partyi BNF i Andrej Dźmitryjeŭ», — padsumavaŭ paet.
U vyniku na hałasavańnie była pastaŭlenaja adna kandydatura — Statkievič. «Za» prahałasavała 16 čałaviek. Vacłaŭ Areška, Hienadź Fiadynič i Alena Tałstaja z ruchu «Razam» (jany ŭvohule byli suprać vyłučeńnia kandydata, a prapanavali kampaniju pa skasavańni sajuznaj damovy 1999 hoda) — ustrymalisia.
