U «Našu Nivu» pryjšoŭ zvarot ad piedahohaŭ Minskaj vobłaści, u jakim jany narakajuć na «biazładździe, źviazanaje z prymusam vučniaŭ starejšych kłasaŭ ustupać u BRSM».
Jany dasłali ksierakopiju zahada Minabłvykankama «Ab praviadzieńni abłasnoha konkursa «Za dasiahnieńnie vysokich pakazčykaŭ u raźvićci adukacyi» na lepšuju arhanizacyju raboty ŭstanovy adukacyi, ŭpraŭleńnia adukacyi […]».
Siarod kryteryjaŭ, pa jakich Minabłvykankam aceńvaje paśpiachovaść škoły, jość dola siabroŭ BRPA (pijanierskaja arhanizacyja) i BRSM u kalektyvie.
«I piedahohi, i baćki, i vučni aburanyja tymi arhumientami, z dapamohaj jakich dziaciej prymušajuć ustupać u hetuju arhanizacyju: źnižeńnie adznak, prablemy z pastupleńniem, pazbaŭleńnie premij kiraŭnictva škoł. Zdavałasia b, jakim čynam pakazčyki raboty škoły jak vučebnaj ustanovy mohuć zaležać ad adnoj asobna ŭziataj hramadskaj arhanizacyi?», — rytaryčna pytajucca aŭtary lista.
Zahad vydadzieny 5 listapada. Što pra jaho dumajuć u Ministerstvie adukacyi?
Jak zapeŭniła «Našu Nivu» pres-sakratar viedamstva Ludmiła Vysockaja, Minadukacyi da hetaha dakumienta nie maje dačynieńnia.
«Hałoŭnaje ŭpraŭleńnie pa adukacyi Minabłvykankama, jakoje vydała zahad, nie padparadkoŭvajecca Ministerstvu adukacyi. Atrymlivajecca, što jość dźvie słužby, jakija kuryrujuć adukacyju: Ministerstva i ŭpraŭleńnie, jakoje padparadkoŭvajecca abłasnym, rajonnym ci haradskim uładam.
U nas była pastanova «Ab nieŭłaścivych funkcyjach», ni pra jaki abaviazak ab padpiscy na vydańni, zbor makułatury, ustupleńnie ŭ BRSM z našaha boku havorki nie idzie.
Zrešty, my sami nie zaŭsiody ŭ kursie, što spuskajecca ŭ škoły z upraŭleńnia adukacyi, vam pytacca treba nie ŭ nas», — skazała Vysockaja.
Padobny adkaz nam dali i ŭ pres-słužbie BRSM:
«Z BRSM nie ŭzhadniajucca zahady ŭpraŭleńnia Minabłvykankama. Nahadvajem, što BRSM — heta dabraachvotnaje hramadskaje abjadnańnie. Našaja pryncypovaja pazicyja nakont dałučeńnia da našych šerahaŭ — vyklučna pa ŭłasnym žadańni», — adkazali ŭ arhanizacyi.
Dyk a što tady kažuć u samim hałoŭnym upraŭleńni pa adukacyi Minabłvykankama?
Nam adkazała śpiecylistka pa vychavaŭčaj rabocie — Taćciana Ćvirko.
«Dadzienyja sastarełyja. Našym upraŭleńniem uniesienyja źmieny ŭ zahad i hetyja pakazčyki — pad №9 — užo nie ŭvachodziać u pieralik kryteryjaŭ. Papraŭka da zahadu była padpisana 30 listapada. Hetaha ŭžo niama», — skazała jana.
Na pytańnie, čamu niama i ci nadoŭha zachavajucca takija praviły, Taćciana Ćvirko adkazała tak: «Heta ŭzvažanaja pazicyja kiraŭnictva»
Taksama va ŭpraŭleńni adznačyli, što hrašovymi premijami pieramoha ŭ hetym konkursie nie adznačajecca — tolki dypłomami.
