Hrupa prychadžanaŭ carkvy śviatoha Archanhieła Michaiła ź minskaha mikrarajona Sucharava 28 listapada mieła sustreču ź mitrapalitam Minskim i Zasłaŭskim Paŭłam.
Sprava ŭ tym, što na listapad i śniežań nie byli zapłanavanyja ŭžo tradycyjnyja niadzielnyja biełaruskamoŭnyja liturhii. Raniej ich, jak praviła, pravodziŭ ajciec Alaksandr Šramko, jakomu ŭ kastryčniku zabaranili słužeńni na hod za krytyku patryjarcha Kiryła i jahonaj šmatlikaj achovy.
Teołah, mahistr fiłasofskich navuk Natalla Harkovič u svaim fejsbuku napisała, što viernikam prapanavali słužyć biełaruskamoŭnyja liturhii raz na try miesiacy (raniej było štomiesiac) i nie ŭ niadzielu, a ŭ budni dzień, što prychadžan, vidavočna, nie zadavolvała. Taksama admianialisia biełaruskamoŭnyja słužby na bujnyja chryścijanskija śviaty, takija jak Vialikdzień i Rastvo Chrystova.
Maŭlaŭ, nastajaciel chrama Ihar Hałakoŭ atrymaŭ piśmovy dazvoł ad mitrapalita Paŭła na takija źmieny. Praŭda, vierniki nie pahadzilisia z takimi raskładami. Taja ž spadarynia Harkovič inicyjavała zbor podpisaŭ. Pa jaje słovach, na takija słužby prychodziła zaŭsiody najmieniej 50 čałaviek.
Mitrapalit Pavieł chutka adreahavaŭ na prośby viernikaŭ. I zaprasiŭ padpisčykaŭ zvarotu da siabie. U vyniku štomiesiačnaja niadzielnaja liturhija ŭ Sucharavie viernutaja ŭ raskład. Plus da ŭsiaho 7 studzienia, na śviata Božaha Naradžeńnia, biełaruskamoŭnaja liturhija projdzie a 9-j ranku ŭ Duchoŭnaj akademii.
