Dziaržaŭny abvinavaŭca vystupaŭ u sprečkach bolš za 1 hadzinu 30 chvilin. Sudździa admoviŭ advakatam u chadajnictvie ab čarhovym pierapynku ŭ pracesie, piša «Radyjo Svaboda.».
17 kastryčnika sudździa abviaściŭ ab tym, što sprava ab śmierci Alaksandra Koržyča skončanaja. U hety dzień na pracesie vystupili apošnija śviedki — siastra i siabra Alaksandra Koržyča. Taksama 17 kastryčnika prakuror Šarśnioŭ abviaściŭ vyniki pravierki pa fakcie ŭžyvańnia fizyčnaha hvałtu supracoŭnikami KDB u dačynieńni da abvinavačanych siaržantaŭ Baranoŭskaha, Viaževiča i Skuratoviča.
Advakaty abvinavačanych vystupili z chadajnictvam ab čarhovym pierapynku ŭ spravie dla aznajamleńnia z vyrakam pa spravie staršaha lejtenanta Paŭła Sukavienki i praparščyka Artura Virbała (jaho ahučać u piatnicu 19 čysła — RS), adnak sudździa adchiliŭ chadajnictva.
Pieršym u sprečkach bakoŭ vystupiŭ prakuror Šarśnioŭ. Jon zajaviŭ, što «abvinavačanyja na praciahu niekalkich miesiacaŭ dziorzka i adkryta čynili biezzakońnie na terytoryi vajskovaj častki, što stała pryčynaj ciažkich nastupstvaŭ u vyhladzie samahubstva šarahoŭca Alaksandra Koržyča». Padčas svajoj pramovy dziaržaŭny abvinavaŭca pieraličyŭ fakty supraćpraŭnych dziejańniaŭ z boku kožnaha z abvinavačanych. Šarśnioŭ pieraličyŭ vypadki vymahalnictva, fizyčnych pakarańniaŭ, niezakonnaha prysvojvańnia hrašovych srodkaŭ, niezakonnaha prymusu da vykanańnia fizyčnych praktykavańniaŭ.
Abvinavačanyja Jaŭhien Baranoŭski, Anton Viaževič i Jahor Skuratovič. Žnivień 2018 hodu.
Na dumku dziaržaŭnaha abvinavaŭcy, u vyniku złačynnych dziejańniaŭ abvinavačanyja siaržanty atrymali materyjalnuju karyść: Skuratovič — 120 rubloŭ, Baranoŭski — 220 rubloŭ, Viaževič — 102 rubli. Taksama kožny ź ich, na dumku prakurora, u roznaj stupieni ŭdzielničaŭ u źbićci padnačalenych šarahoŭcaŭ i ŭ vymahańni ŭ ich hrošaj, praduktaŭ charčavańnia i cyharet.
«Svaje dziejańni abvinavačanyja ździajśniali pa papiaredniaj zmovie, dziorzka i adkryta», — zajaviŭ prakuror Šarśnioŭ. Taksama dziaržaŭny abvinavaŭca vykazaŭ upeŭnienaść, što na pracesie byŭ dakazany fakt samahubstva Alaksandra Koržyča, padstavaŭ havaryć pra zabojstva niama.
Prakuror paprasiŭ sud pryznać abvinavačanych vinavatymi i pakarać Jaŭhiena Baranoŭskaha 9 hadami pazbaŭleńnia voli z kanfiskacyjaj majomaści, Antona Viaževiča — 7 hadami pazbaŭleńnia voli z kanfiskacyjaj majomaści, Jahora Skuratoviča — 6 hadami z kanfiskacyjaj majomaści. Usich abvinavačanych prakuror taksama paprasiŭ pazbavić prava zajmać kirujučyja pasady.
Dziaržaŭny abvinavaŭca vystupaŭ u sprečkach bolš za 1 hadzinu 30 chvilin.
Siaržanty Jaŭhien Baranoŭski, Jahor Skuratovič i Anton Viaževič byli zatrymanyja ŭ kastryčniku 2017 hodu, nieŭzabavie paśla śmierci Alaksandra Koržyča. Ich abvinavacili ŭ atrymańni chabaru paŭtorna, a taksama pa častkach 2 i 3 artykuła 455 Kryminalnaha kodeksu Biełarusi — u pieravyšeńni albo biaździejańni ŭłady, jakoje paciahnuła za saboj ciažkija nastupstvy. Hety artykuł praduhledžvaje pakarańnie da 12 hadoŭ pazbaŭleńnia voli.
Usie abvinavačanyja svaju vinu na pracesie pryznali častkova. Jany admaŭlajuć toje, što dapuščanyja imi pravaparušeńni stali pryčynaj samahubstva Alaksandra Koržyča.
