Vydańnie «Viečiernij Mohilov» padčas čarhovaha vosieńskaha pryzyvu napisała pra chłopcaŭ, jakija ŭnikajuć słužby ŭ vojsku. U drukavanym varyjancie haziety ad 10 kastryčnika aŭtar Palina Malinina raspaviała pra sud nad adnym z maładych ludziej, jaki admoviŭsia słužyć u vojsku, bo «nie ŭmieje čytać i pisać». Pavodle «Viečiernieho Mohilova», pryzyŭnik nie źjaviŭsia na miedycynskim ahladzie i suprać jaho raspačali kryminalnuju spravu za ŭnikańnie słužby.
«Ciapier chłopiec pracuje pastuchom u miascovym kałhasie. U sudzie da jaho byli pabłažlivymi i pryznačyli pakarańnie, nie źviazanaje z pazbaŭleńniem voli», — piša hazieta.
Palina Malinina adznačaje, što hieroj materyjału baicca słužby ŭ biełaruskim vojsku bolš, čym kryminalnaha pieraśledu. I prychodzić da niečakanaj vysnovy:
«Mnie zdajecca, jaho aściarohi nie daremnyja. Jak pakazali niadaŭnija padziei ŭ Piečach, takija jak jon, małapiśmiennyja i słabacharaktarnyja, u vojsku stanoviacca abjektam dla ździekaŭ».
Napeŭna, aŭtar maje na ŭvazie «spravu Koržyča». U kastryčniku 2017 hoda ŭ navučalnym centry Uzbrojenych sił znajšli paviešanym radavoha Alaksandra Koržyča. Ciapier prachodzić sud. Pa viersii dziaržabvinavačańnia, sałdata daviali da samahubstva. Maci Koržyča ŭ heta nie vieryć i ličyć, što jaje syna zabili.
Akramia hetaha, užo pa inšaj spravie sioleta ŭ červieni za dziedaŭščynu ŭ Piečach da troch miesiacaŭ aryštu prysudzili staršaha lejtenanta Hleba Čajkoŭskaha.
