Jak paviedamiła BiełaPAN śledčy Baraŭlanskaha adździeła Minskaha RUUS Alena Chilčuk, zapłanavany na hety tydzień śledčy ekśpierymient pieraniesieny na dzień, kali ŭmovy nadvorja buduć adpaviadać mietearałahičnaj abstanoŭcy na 1 listapada. Śledčy ličyć, što ekśpierymient budzie praviedzieny ŭ najbližejšy čas, dla čaho nakiravany zapyt u Hidramieteacentr.
Jak zaznačyła A.Chilčuk, termin rasśledavańnia pa hetaj kryminalnaj spravie zhodna z Kryminalna‑pracesualnym kodeksam składaje dva miesiacy. Takim čynam, rasśledavańnie pavinna zaviaršycca nie paźniej za 11 studzienia 2009 hoda.
Uviečary 1 listapada pradstaŭniki hramadskaści Alaksandr Makaŭ i Aleh Śvirydaŭ zatrymali padazronych u Kurapatach i pieradali ich supracoŭnikam milicyi. 11 listapada Baraŭlanskim adździełam raspačata sprava pa častcy 2 artykuła 346 KK (źnievažańnie historyka‑kulturnych kaštoŭnaściaŭ), zhodna ź jakoj praduhledžana pakarańnie ŭ vyhladzie štrafu, abo aryštu na termin da šaści miesiacaŭ, abo abmiežavańnia voli na termin da troch hadoŭ, abo pazbaŭleńnia voli na toj ža termin. Nieabchodnaść praviadzieńnia śledčaha ekśpierymienta supracoŭniki milicyi matyvujuć tym, što maładyja ludzi aktyŭna asprečvajuć padazreńni va ŭčynieńni złačynstva.
Za apošnija try hady pa faktach vandalizmu ŭ Kurapatach, z 1993 hoda ŭniesienych u Dziaržaŭny śpis historyka‑kulturnych kaštoŭnaściaŭ Respubliki Biełaruś jak pomnik historyi mižnarodnaha značeńnia «Miesca źniščeńnia achviar palityčnych represij 1930—1940‑ch hadoŭ va ŭročyščy Kurapaty», treci raz raspačynajecca kryminalnaja sprava. Upieršyniu spravu adkryŭ Minski RUUS u śniežni 2005 hoda pa artykule 341 KK (apahańvańnie zbudavańniaŭ i psavańnie majomaści), druhi raz — u sakaviku 2008 hoda pa častcy 1 artykuła 339 KK (chulihanstva). U abodvuch vypadkach złačyncy nie byli ŭstanoŭleny.
