Rasijski žurnalist Arkadź Babčanka, na jakoha chacieli ździejśnić zamach, zajaviŭ u svaim fejsbuku, što Rasija rychtavała masavyja terakty pa ŭsioj Ukrainie, a da jaho zamachu datyčnyja śpiecsłužby Rasii i rasijski biznesmien Jaŭhien Pryhožyn.
Fota: Radio Svoboda.
Jon adznačyŭ, što, imavierna, Pryhožyn «vielmi nie lubić, kali pra jaho pačynajuć pisać u hazietach». Pa słovach Babčanki, u Rasii napadali na ŭsich žurnalistaŭ, jakija pisali pra Pryhožyna.
«Niezadoŭha da zakazu na mianie pra Pryhožyna pačaŭ pisać ja», — napisaŭ Babčanka.
Pa słovach žurnalista, pra dačynieńnie śpiecsłužb Rasii da zamovy na zamach kaža toje, što ŭ aryjenciroŭcy na zabojstva byli jaho pašpartnyja danyja, adras, a taksama pašpartnyja danyja i adras jaho žonki, a taksama danyja pra jaho słužbu ŭ vojsku.
Pa słovach žurnalista, zamach na jaho moh adbycca 26 maja, kali ŭ Kijevie prachodziŭ finał Lihi čempijonaŭ pa futbole. A niezadoŭha da hetaha rasijskija ŚMI tyražavali fejk pra toje, što «Isłamskaja dziaržava» nibyta rychtuje ŭ Kijevie terakty da finału ŁČ.
Taksama Babčanka ličyć, što śpiecsłužby Rasii rychtavali minimum dva zamachi — na jaho i raniej na jašče adnaho hramadzianina Rasii, jaki atrymaŭ palityčny prytułak u Vialikabrytanii.
Jon taksama paviedamlaje, što paśla «svajho ŭvaskrašeńnia» nieadnarazova atakavaŭsia trolami ŭ sacsietkach i ŭpeŭnieny, što śpiecsłužby Rasii majuć dostup da jaho miesiendžara.
Babčanka zajaŭlaje, što «Rasijaj rychtavalisia masavyja terarystyčnyja akty pa ŭsioj Ukrainie».
«Rychtavalisia doŭha. Rychtavalisia surjozna. Ź pieranosnymi zienitna-rakietnymi kompleksami, z supraćtankavymi kompleksami, z hranatamiotami, z hrupoŭkami ŭ roznych haradach, sa stvareńniem prarasijskich partyj, z zakidvańniem terarystyčnych hrupovak z Rasii i hetak dalej», — zajaŭlaje Babčanka.
Pavodle jaho słoŭ, terakty va Ukrainie rychtavalisia jak minimum za 11 miesiacaŭ da zamachu na jaho.
«Jak miarkujecca, ślady zamovy terarystyčnych aktaŭ viaduć da kuchara Pucina Jaŭhiena Pryhožyna. Jaho struktury pracujuć u ciesnym uzajemadziejańni sa śpiecsłužbami Rasii. Imavierna, i kaardynujucca mienavita adtul. Heta daje padstavu kazać pra dziaržaŭny teraryzm», — zajaŭlaje Babčanka.
