Papa Francišak z prezidentam Kierści Kaljułajd, fota Sergei Stepanov, err.ee
Papa Rymski Francišak u ramkach svajho vizitu ŭ krainy Bałtyi atrymaŭ paśviedčańnie virtualnaha rezidenta Estonii, paviedamlaje ERR.
Dydžytał-paśviedčańnie kiraŭniku katalickaj carkvy ŭručyła prezident Estonii Kierści Kaljułajd. Jak paviedamlaje DELFI, Papa staŭ 37 647-m e-rezidentam krainy.
Ličbavaje rezidenctva Estonii, zapuščanaje ŭ 2014 hodzie, daje zamiežnym hramadzianam abaronieny dostup da elektronnych pasłuhaŭ krainy. Jak havorycca ŭ infarmacyi na partale pa rehistracyi elektronnych rezidentaŭ, z elektronnym estonskim ID možna padpisvać dakumienty ličbavym podpisam. E-rezident Estonii moža praź internet zasnoŭvać u krainie kamiercyjnaje abjadnańnie, dystancyjna ŭdzielničać u jaho kiravańni biez pryznačeńnia dyrektaram hramadzianina krainy, rabić anłajn-płaciažy, i, u adroźnieńnie ad inšych zamiežnikaŭ, vieści sproščany dakumientaabarot i dekłaravać vypłačanyja ŭ krainie padatki.
U toj ža čas virtualnaje rezidenctva Estonii nie daje padatkovaha rezidenctva, pravy na pražyvańnie ŭ Estonii i dazvołu na ŭjezd u krainu abo Jeŭrapiejski sajuz. Na im adsutničaje fota. Dydžytał-ID nie źjaŭlajecca fizičnym dakumientam, jaki paćviardžaje asobu, ci prajaznym dakumientam. Dla atrymańnia statusu virtualnaha rezidenta zajaŭnik pavinien zapłacić pošlinu 100 jeŭra i pradastavić elektronnuju kopiju pašparta. 10% z 37 tys. estonskich elektronnych rezidentaŭ — hramadzianie Finlandyi.
