15 vieraśnia ŭ Minsku projdzie ŭračystaje zakryćcio motasiezona, jakoje pravodzicca pad ehidaj «Charlej Davidsan». Arhanizatary zajaŭlajuć, što zakryćcio źbiraje niekalki tysiač udzielnikaŭ. Zvyčajna ŭ takich mierapryjemstvach udzielničaje i syn Alaksandra Łukašenki — Viktar. Jon, darečy, jak kažuć, člen motakłuba «Iron Birds».
Arciom Čajka i Viktar Łukašenka
U minułym hodzie śpiecyjalnym ukazam prezidenta bajkieram dazvolili ŭjezd u Biełaruś bieź vizy. Sioleta — taksama. Adzinaja ŭmova — treba nabyć kvitok na viečarovy kancert, jaki projdzie ŭ «Falkon Kłabie».
«Falkon kłab» naležyć katarskamu biznesu, z pradstaŭnikami jakoha ŭ Viktara Łukašenki daŭnija pryjacielskija suviazi.
Kvitki kaštujuć 230 i 160 rubloŭ. Daražejšyja — heta miesca za stolikam, takija kvitki ŭsie raskuplenyja.
Zabaŭlać bajkieraŭ buduć amierykanskija rokiery skid row i rasiejski pop-hurt «Dyskateka Avaryja».
Arhanizuje mierapryjemstva kampanija «Mota Ivent». Jaje dyrektarka — 23-hadovaja minčanka Jana Sahanovič.
«Naša Niva» pacikaviłasia ŭ Sahanovič, jak ža atrymać dazvoł na bieźvizavy ŭjezd? Pa słovach surazmoŭcy, vielmi prosta.
«Dy prosta zaprošvali dazvoł ŭ prezidenta. Heta rabiła naša kampanija «Mota-Ivent». Padobnaja sistema, jak pry ŭjeździe na čempijanat śvietu pa chakiei rabili», — adkazała Sahanovič.
Dyrektarka «Mota Ivent» adznačyła, što nadzvyčajnych mier biaśpieki ŭ suviazi z ŭdziełam Viktara Łukašenki, nie čakajecca.
«Usio budzie jak zvyčajna», — kaža Sahanovič.
Akramia «Mota Ivent», pastajanny arhanizatar adkryćcia i zakryćcia minskaha motasiezona — bajkierski kłub «Iron Birds». Kłub byŭ zasnavany ŭ Rasii ŭ 2012 hodzie Arciomam Čajkam, synam rasijskaha hienprakurora, jaki atrymaŭ skandalnuju viadomaść paśla rasśledavańniaŭ Alaksieja Navalnaha.
