Siarhiej Rumas. Fota Siarhieja Hudzilina
Ukaz ab pryznačeńni Siarhieja Rumasa na pasadu premjer-ministra ŭžo apublikavany (PDF). U im jość spasyłka na p.6 art.84 Kanstytucyi Biełarusi: prezident pryznačaje premjer-ministra sa zhody Pałaty pradstaŭnikoŭ.
Ale Pałata pakul aficyjna nie vykazvała zhody adnosna kandydatury ŭžo pryznačanaha premjera, adznačaje «Radyjo Svaboda». Siarod inšych heta adznačyŭ Dzianis Cichanienka, pamočnik deputatki Pałaty pradstaŭnikoŭ ad AHP Hanny Kanapackaj.
Va ŭkazie jość słovy «pryznačyć (…) z nastupnym uzhadnieńniem jahonaha pryznačeńnia z Pałataj pradstaŭnikoŭ». Dy ŭ Kanstytucyi niama słovaŭ «z nastupnym uzhadnieńniem» — tolki «sa zhody». Biez udziełu nižniaj pałaty nielha navat pryznačać vykanaŭcu abaviazkaŭ premjera, a Rumasa nazyvajuć nie «v.a.», a paŭnavartasnym premjer-ministram.
Takim ža čynam, biez papiaredniaj zhody deputataŭ, pryznačali papiaredniaha premjera Andreja Kabiakova.
Były sudździa Kanstytucyjnaha suda Biełarusi Michaił Pastuchoŭ kaža Svabodzie, što «pavodle jurydyčnaj łohiki» sapraŭdy spačatku nieabchodna atrymać zhodu Pałaty pradstaŭnikoŭ, tolki paśla vydavać ukaz ab pryznačeńni premjera. Takoj pracedury, kaža jon, prytrymlivajucca va ŭsich jeŭrapiejskich krainach.
«U nas zaviadzionka takaja skłałasia, što prezident nie ličycca ź mierkavańniem subjektaŭ, jakija musiać brać udzieł u farmavańni ŭradu, rašaje pytańni asabista, — adznačaje Pastuchoŭ. — Na moj pohlad, heta istotnaje parušeńnie Kanstytucyi, jakoje pryvodzić da taho, što nielha ličyć zakonnym pryznačeńnie premjer-ministra».
Pracedura pryznačeńnia premjera, kaža Pastuchoŭ, musić być takoj: u parłamiencie maje prajści abmierkavańnie pryčyn adstaŭki papiarednika i prahramy dziejnaści kandydata, vystup kandydata ŭ premjery z prahramaj dziejnaści. Praces «nie taki chutki i nie taki prosty, jak nam sprabavali pradstavić», dadaje jon.
Ci mahčyma vypravić «zboj» z pryznačeńniem čałavieka na pasadu, druhuju pa značnaści ŭ dziaržavie? Pastuchoŭ miarkuje, što tearetyčna «možna vykrucicca», «jurysty mohuć znajści vyjście ź luboj situacyi».
«Ale ŭ dadzienym vypadku heta ŭžo kanstatavana, daviedziena da hramadzkaści, — reziumuje Pastuchoŭ pryznačeńnie premjera ŭ abychod Pałaty pradstaŭnikoŭ. — Ciapier davać zadni chod budzie niepryhoža. Situacyju možna było b jak-niebudź vypravić, ale nie dumaju, što kiraŭnik dziaržavy budzie źviartać uvahu na takija «drobiazi» ŭ dvukośsi».
