Staršyniu horadzienskaj arhanizacyi Abjadnanaj hramadzianskaj partyi Mikałaja Salanika sud Kastryčnickaha rajonu Horadni pakaraŭ štrafam u 612,5 biełaruskaha rubla (25 bazavych vieličyniaŭ). Razhlad administracyjnaj spravy adbyŭsia 17 žniŭnia, piša «Radyjo Svaboda».
63-hadovaha Mikałaja Salanika abvinavacili ŭ tym, što jon parušyŭ paradak arhanizacyi masavych mierapryjemstvaŭ i nie padparadkoŭvaŭsia supracoŭnikam milicyi i AMAPu (častka 1 artykuła 23.34 i 23.4 KaAP Biełarusi). Spravu razhladała sudździa Taciana Hierhiel.
Pavodle sudu, siarod pravaparušeńniaŭ Salanika — raźmiaščeńnie ŭ Facebook fatazdymka ź im i kaleham pa Abjadnanaj hramadzianskaj partyi Alaksandram Łaŭrenćjevym u «pałasatym adzieńni» («u parušeńnie paradku ab arhanizacyi masavaha mierapryjemstva … udzielničaŭ u pikietavańni, arhanizavanym praź internet»), niepadparadkavańnie milicyi, kali da jaho pryjšli z pravierkaj pa spravie źnikłaha Maksima Marchaluka, a taksama pry zatrymańni 3 lipienia.
Mikałaj Salanik i Alaksandar Łaŭrenćjeŭ planavali vyjści na vulicu na Dzień Niezaležnaści ŭ turemnych robach. Salanik symbalična nakinuŭ Łaŭrenćjevu piatlu na šyju i zakleiŭ jamu rot skotčam. Adnak jak tolki jany vyjšli z padjezda, ich zatrymali nieviadomyja ŭ cyvilnym. Jak paźniej vyśvietliłasia, heta byli supracoŭniki AMAP.
U Salanika chvoraje serca. Ź milicyi jon trapiŭ u špital, sud nad im adbyŭsia paźniej, čym nad kaleham.
7 žniŭnia sud pakaraŭ Łaŭrenćjeva za niepadparadkavańnie milicyi i parušeńnie paradku praviadzieńnia masavych mierapryjemstvaŭ štrafam u 490 rubloŭ (20 bazavych vieličyń). Jon nia zdoleŭ abskardzić rašeńnie sudu.
