Parafiju, likvidavanuju balšavikami, adradžajuć praz 80 hadoŭ.
Dapamožny biskup Pinskaj dyjacezii Kazimir Vielikasielec 15 žniŭnia, u śviata Uśpieńnia Najśviaciejšaj Panny Maryi, aśviaciŭ kryž i ziamlu pad budaŭnictva adnajmiennaha katalickaha chrama ŭ Homieli.
Kaścioł z takim tytułam isnavaŭ u horadzie da 1938 hoda. Zatym ułada balšavikoŭ zakryła parafiju, śviataroŭ represavali i zabili, a ŭ 1940 hodzie kaścioł, jaki znachodziŭsia na centralnaj płoščy, uzarvali kamunisty.
Biskup Kazimir Vielikasielec, kali pryjechaŭ słužyć u Homiel, adradziŭ parafiju i zarehistravaŭ jaho ŭ 2013 hodzie, zatym pačaŭ zajmacca spravaj vydzialeńnia ŭčastka dla budaŭnictva chrama. Uzvodzić kaścioł vyrašyli nie na histaryčnym miescy, a ŭ Savieckim rajonie horada — na skryžavańni Rečyckaha praśpiekta i vulicy Abjaznoj. Na centralnaj płoščy budavać chram zaraz amal niemahčyma, i ŭ hetym niama vialikaha sensu.
Pakul adziny kaścioł u horadzie znachodzicca taksama ŭ centry, a ŭ inšych rajonach Homiela niama katalickich chramaŭ, i vierniki vymušany doŭha dabiracca da kaścioła.
Učastak pad budaŭnictva novaha chrama byŭ vydzieleny na ŭskrainie horada, u hetym hodzie tam pačalisia padrychtoŭčyja raboty. Užo vykapali katłavan i prakłali kamunikacyi, ustalavany kryž i fihura Maci Božaj, chutka źjavicca tut i časovaja draŭlanaja kaplica.
Takim čynam kaścioł budujecca praz 80 hadoŭ paśla zakryćcia raniejšaj parafii.
