U sudzie Maskoŭskaha rajona Minska 8 žniŭnia pačaŭsia praces pa spravie ab śmierci sałdata terminovaj słužby Alaksandra Koržyča. Na łavie padsudnych — troje starasłužačych. Ich vinavaciać u chabary, kradziažy i złoŭžyvańni słužbovymi paŭnamoctvami, što pryviało da ciažkich nastupstvaŭ.
Alaksandr Koržyč
Visieŭ u piatli 7 dzion
Nahadajem, cieła Koržyča sa źviazanymi nahami i majkaj na hałavie znajšli 3 kastryčnika ŭ padvale budynka miedyčnaj roty ŭ Piačach. Koržyč pravisieŭ u piatli 7 dzion, jaho nie mahli znajści, bo vajskoŭcy dumali, što jon u miedčastcy, a miedyki — što jaho zabrali vajskoŭcy.
Vyśvietliłasia, što «dziady» pastajanna spahaniali z Koržyča hrošy. A bankaŭskuju kartku chłopca ŭvohule adabraŭ praparščyk.
Paśla śmierci Alaksandra Koržyča ŭ vojsku prajšła chvala zatrymańniaŭ. Pravierki — a paśla i sudy nad vajskoŭcami — prakacilisia pa ŭsioj krainie. Za pieršaje paŭhodździe 2018 hoda asudzili 28 vajskoŭcaŭ.
Raśledavańnie spravy Koržyča išło niekalki miesiacaŭ. Łukašenka asabista dazvoliŭ maci zahinułaha prysutničać na dopytach vajskoŭcaŭ. U vyniku śledčyja ŭsio ž vyrašyli, što heta było samahubstva, a nie zabojstva.
Sudziać traich siaržantaŭ
8 žniŭnia na łavie padsudnych — troje maładych chłopcaŭ: Jaŭhien Baranoŭski, Anton Viaževič i Jahor Skuratovič. Usie jany byli siaržantami ŭ častcy, dzie słužyŭ Alaksandr Koržyč.
20-hadovy Skuratovič rodam z Žabinki — heta maleńki horad u Bresckaj vobłaści, 23-hadovy Baranoŭski — ź vioski na Barysaŭščynie. Viaževiču — 22 hady, naradziŭsia ŭ vioscy pad Minskam. Jon adziny z chłopcaŭ žanaty, navat maje syna (pryčym baćkam staŭ prykładna ŭ 17 hadoŭ).
Akramia taho, u zali suda — 22 sałdaciki. Spačatku zdavałasia, što toje, jak časam robicca, nahnali maładych na pakazalny sud. Ale vyśvietliłasia, što ŭsie 22 čałavieki prachodziać paciarpiełymi pa spravie.
Prakuror Jury Šarśnioŭ ahučyŭ abvinavačvańnie.
Jaŭhien Baranoŭski pajšoŭ słužyć 20 maja 2016. Šmatlikija paciarpiełyja trapili ŭ armiju praz hod. Hetym i skarystaŭsia abvinavačvany.
Zamiest taho, kab sačyć za dyscyplinaj, Baranoŭski, na toj momant užo siaržant, uklučyŭsia ŭ jaje parušeńnie. Mabilniki, jakija jon zaŭvažaŭ u sałdat, Baranoŭski pakidaŭ sabie. Nikomu pra heta nie dakładvaŭ. «Maładyja» vymušanyja byli prasić u jaho svaje mabilnyja «ŭ arendu». Za adzin sieans suviazi Baranoŭskamu płacili 30—40 rubloŭ.
Alaksandr Koržyč taksama źviartaŭsia da siaržanta i taksama vymušany byŭ płacić.
Płacili sałdaty siaržantu i za mahčymaść schadzić u kramu. Tut padatak braŭsia tavarami: raspuščalnaja kava «3 u 1», vafli, cyharety, makarony «Rołtan»… Usio heta, pavodle śledstva, išło siaržantu Baranoŭskamu.
Adnymi hrašyma nie abmiažoŭvalisia. Baranoŭski ź jašče adnym siaržantam, Skuratovičam, padymali sałdat i prymušali adciskacca. Takim čynam «maładych» karali za niedastatkova chutkaje šychtavańnie, kiepska pryšytyja kaŭnieryki. Časam chłopcaŭ padymali i nočču z łožkaŭ.
Padčas adciskańniaŭ ich niaredka prymušali zamirać na paŭsahnutych rukach. Adnojčy za razmovy paśla kamandy «adboj» sałdat padniali z łožkaŭ i prymusili adciskacca ŭ supraćhazach. Adzin ź ich spačatku admoviŭsia, ale, atrymaŭšy niekalki ŭdaraŭ ad siaržanta, usio ž pačaŭ adciskacca.
Toje ž rabiŭ i siaržant Jahor Skuratovič. Braŭ z sałdataŭ pradukty za dazvoł schadzić u kramu, braŭ hrošy. Zdavaŭ u arendu «kanfiskavanyja» mabilniki, prymušaŭ «maładych» adciskacca.
Časam prydumlali i sadysckija pakarańni. «Zahadaŭ ablizać joršyk dla ŭnitaza», — začytaŭ prakuror.
Adbirali ježu i bili praź flahu
Akramia taho, siaržanty adbirali ŭ «maładych» ježu, jakuju tym pieradavali svajaki: kiłbasu, sała, kurycu, navat cukierki i jabłyki. Niekatoryja «duchi» — siarod ich i Alaksandr Koržyč — płacili za toje, kab ich nie bili ci nie prymušali vykonvać zahady siaržantaŭ. Kaštavaŭ taki «imunitet» u zaležnaści ad situacyi kala 30 rubloŭ.
Za čas słužby siaržant Baranoŭski takim čynam zarabiŭ na sałdatach nie mienš za 220 rubloŭ.
Časam siaržanty prajaŭlali fantaziju. Adnaho z sałdat na niekatory čas pryčapili naručnikami da batarei. Inšaha, jakoha złavili z cyharetaj u prybiralni, prymusili prybiralniu myć. Voś tolki pierad hetym Baranoŭski vymazaŭ usio pamiaškańnie čornaj vaksaj dla čystki abutku.
Bili sałdataŭ praź flahu. Skuratovič prystaŭlaŭ jaje horłam da cieła sałdata, a sam łupiŭ pa doncy.
Treci siaržant, Anton Viaževič, pavodle śledčych, ničym nie adroźnivaŭsia ad dvuch inšych: adbiraŭ u «maładych» telefony, braŭ praduktovy «padatak». Chiba tolki lubiŭ bolš raznastajnaje mieniu. Kali Baranoŭski i Skuratovič abmiažoŭvalisia cyharetami, «rołtanami», kavaj i vaflami, dyk Viaževič časam zahadvaŭ sałdatu prynieści jamu sałat ci navat picu. Braŭ i hrašyma, i nie tolki. Adnojčy sałdat, kab nie prybirać u kazarmie, adkupiŭsia ad Viaževiča vuściłkami dla abutku.
Ahułam siaržant nabraŭ chabaru bolš čym na 180 rubloŭ.
Udzielničaŭ siaržant Viaževič i ŭ fizičnych ździekach z sałdat. Prymušaŭ rabić prysiadańni, adciskańni paśla adboju.
Taksama Viaževič zahadvaŭ sałdatam słać jamu paściel, prybirać kazarmu ŭnačy. Ubačyŭšy ŭ adnaho z sałdataŭ brudnyja boty, Viaževič prymusiŭ chłopca vycisnuć vaksu sabie na ruki i čyścić boty rukami.
Jak i jaho siabry, siaržant Viaževič sistematyčna adbiraŭ u «maładych» ježu i hrošy, biŭ sałdat praź flažku, łupiŭ dałońniu pa šyi.
Ździekavaŭsia siaržant i niepasredna z Koržyča. Adnojčy Viaževič śpichnuŭ Koržyča ŭ akop i pačaŭ kidać u jaho rydloŭkami. Jany ŭtykalisia ŭ ziamlu pobač z sałdatam.
Taksama prakuror padkreśliŭ, što siaržanty musili lepš razumieć, što jany robiać i što adbyvajecca ŭ častcy, lepš sačyć za padnačalenymi i pradbačyć situacyju z suicydam Koržyča.
Jaŭhien Baranoŭski pryznaŭ vinu častkova. Inšyja siaržanty — taksama. Jahor Skuratovič admoviŭsia pryznavać, što złoŭžyvaŭ uładaj, što i pryviało da suicydu Koržyča. Z tym, što braŭ chabar, jon pahadziŭsia. Anton Viaževič pryznaŭ: chabar braŭ. Ale, maŭlaŭ, nie pa papiaredniaj zmovie. I toje, što złoŭžyvańnie ŭładaj pryviało da śmierci Koržyča, jon taksama pryznavać admoviŭsia.
Akramia taho, abvinavačanyja paprasili dapytać ich tolki paśla taho, jak vysłuchajuć śviedkaŭ i paciarpiełych. Ale sudździa Aleh Łapieka admoviŭ. Svaje pakazańni siaržanty daduć na nastupnym pasiadžeńni, jakoje adbudziecca 9 žniŭnia.
