Biełaruski aktyvist z małoj radzimy Milinkieviča asudžany na 5 miesiacaŭ za padrychtoŭku revalucyi, ale moža być vypuščany ŭmoŭna-daterminova prosta ciapier.
Aktyvist nacyjanalnaha ruchu z Ščučyna Siarhiej Laškievič asudžany pavodle č.3 art.293 Kryminalnaha kodeksu RB («Navučańnie albo inšaja padrychtoŭka asobaŭ da ŭdziełu ŭ masavych biespardkach, a taksama finansavańnie, albo inšaje materyjalnaje zabieśpiačeńnie takich dziejańniaŭ»). Prakuror patrabavaŭ dla byłoha siabry inicyjatyŭnaj hrupy Milinkieviča 6 miesiacaŭ źniavoleńnia. Sudździa pryznaŭ vinu dakazanaj i daŭ piać.
Sud nad Siarhiejem Laškievičam byŭ adkrytym, i pieršaje pasiedžańnie 25 traŭnia adbyvałasia ŭ prysutnaści vialikaj kolkaści paplečnikaŭ i siabroŭ Siarhieja. Padtrymać svajho ziemlaka pryjechaŭ i Alaksandar Milinkievič, jaki nazvaŭ praces zamoŭlenym i palityčnym.
Abvinavačvańnie hruntavałasia na śviedčańniach nieadnarazova asudžanaha hramadzianina Alaksandra Burdzieja. Heta jaho nibyta verbavaŭ Laškievič. U časie pasiedžańnia demanstravali film Jurja Chaščavackaha «Zvyčajny prezydent» i zbornik videaklipaŭ «Niezvyčajny kancert», z dapamohaj jakich Laškievič «navučaŭ teraryzmu» Burdzieja i inšych fihurantaŭ spravy.
Śviedka Valer Škurko nibyta prysutničaŭ pry razmovie, u časie jakoj Burdzieja schilali da ŭdziełu ŭ masavych akcyjach.
Treci śviedka, niechta Navahran, na sud nie źjaviŭsia, matyvujučy heta stracham fizyčnaj raspravy. Ankietnyja źviestki Navahrana byli źmienienyja ŭ metach jahonaj biaśpieki. Jaho śviedčańni, zroblenyja padčas śledčych mierapryjemstvaŭ začytali ŭ sudzie. Ź ich vynikaje, što Siarhiej Laškievič i jaho paplečniki viali antydziaržaŭnuju dziejnaść i jašče ŭ listapadzie minułaha hodu schilali jaho da ŭdziełu ŭ masavych akcyjach.
Arhumenty, prapanavanyja advakatami Siarhieja Laškieviča, sud nie ŭličyŭ.
«Siarhiej Laškievič trymajecca dobra, navat pa-filazofsku», – zaŭvažyŭ jahony advakat Andrej Ščapiatkoŭ. Viny nie pryznaŭ i ŭ zaklučnym słovie paprasiŭ sud vynieści spraviadlivaje rašeńnie.
Pavodle słovaŭ advakata, zhodna z zakanadaŭstvam, Siarhiej maje prava na ŭmoŭna-daterminovaje vyzvaleńnie pa adbyćci pałovy terminu źniavoleńnia: «Usio zaležyć ad jaho samoha: ci zachoča jon abskardžvać rašeńnie sudu, ci nie. Pałovu ž terminu jon užo adbyŭ i maje šancy być vyzvalenym užo ciapier».
Siamion Piečanko
