Saman Kunan. Fota sa staronki ŭ fejsbuku
Karol Tajłanda Macha Vačyrałanhkorn (Rama X) paśmiarotna ŭznaharodziŭ zahinułaha pry vyratavańni dziaciej ź piačory dajviera, staršaha siaržanta zapasu vojskaŭ śpiecpryznačeńnia VMS Tajłanda Samana Kunana dziaržaŭnym ordenam Biełaha słana. Zahad tajskaha karala apublikavany ŭ miascovaj uradavaj haziecie Royal Gazette, piša RBK.
Vadałazu, zhodna z dakumientam, taksama byŭ prysvojeny Rycarski Vialiki Kryž karala Tajłanda (u 1869 hodzie hetaja ŭznaharoda ličyłasia samym vysakarodnym ordenam karony Sijama i da hetaha času zastajecca adnoj z najbolš prestyžnych uznaharod krainy). Akramia hetaha, Kunana Macha Vačyrałanhkorn paśmiarotna pieravioŭ u kapitany treciaha ranhu. Uznaharodami i ordenami, jak ukazvajecca ŭ dakumiencie, dajvier byŭ uhanaravany za «dobryja spravy i addanaść dapamozie ludziam da śmierci».
Samanu Kunanu, jak nahadvaje vydańnie Bangkok Post, było 37 hadoŭ. 10 hadoŭ tamu jon zvolniŭsia ŭ zapas z atrada bajavych płyŭcoŭ tajskaha fłotu. Paśla hetaha mužčyna pracavaŭ u jakaści supracoŭnika słužby biaśpieki mižnarodnaha aeraporta Suvanapchum u Banhkoku. U Čanh Rai dla ŭdziełu ŭ apieracyi pa vyratavańni 12 padletkaŭ i ich futbolnaha treniera, zabłakavanych pavodkaj u piačory Kchao Łuanh, Kunan vyklikaŭsia dobraachvotnikam.
6 lipienia stała viadoma pra toje, što jon straciŭ prytomnaść na zvarotnym šlachu ź piačory, dastaviŭšy ŭ jaje kisłarodnyja bałony. «Jaho pracaj było dastaŭlać kisłarod. Ale jamu nie chapiła [kisłarodu] na darohu nazad», — tłumačyŭ namieśnik hubiernatara vobłaści Čanh Rai Pasakorn Buńjałak.
Orden Biełaha słana źjaŭlajecca adnym z najstarejšych vyšejšych ordenaŭ Tajłanda. Hetaja ŭznaharoda prysvojvajecca vajennym i hramadzianskim asobam za zasłuhi pierad Karaleŭstvam Tajłand.
12 padletkaŭ ź miascovaj futbolnaj kamandy i ich 25-hadovy trenier źnikli bieź viestak u Tajłandzie 23 červienia. Ratavalniki znajšli ich u piačory Kchao Łuanh u zapaviedniku «Ponh Pcha». Prachod da dziaciej i treniera apynuŭsia zatopleny ručajom, uzrovień vady ŭ jakim mocna padniaŭsia praz daždžy. 25 červienia da vyratavalnaj-pošukavaj apieracyi dałučyŭsia śpiecnaz VMS Tajłanda. 10 lipienia ź piačory vyvieli apošnich ludziej, jakija zastavalisia tam.
